AKP rfıdle a şartat d’Al Asad leşan dloqın hıdode

ANKARA – U hadomo di sictho qentrunoyto da fusqone udu tefitathe la haye bu gabo d’AKP Orhan Miroğlu huwle maqırhonutho l’dafo Rusoyto, cala şartat dmahıtle u rişathro d’Suriya Başar al Asad qum du rişqutno Turkoyo Erdoğan, leşan dhowe mkono l’ytawto beynothaye. Beyn da şartat dmahıtwole al Asad qum Ankara, tlıbwole mena dgurşo a folhayda kulle me Suriya. 

Camathe tlıbwole’ste me Turkiya dmaklıyo u snodayda li marhıbonutho u dımcadlo i aykanoyutho da dukotho dkbişiwola lu mede dkıtwın meqım mu qrobo. Al Asad mırwole; Hano u darbo ihidoyo’yo dkibe dfotıh qum di ytawtaydi camu rişqutno Erdoğan. Dloste, mın timo gıdhowela i ytawtathe u leşan mın gıdmisomo, en dlo motina l’netiçe msimonitho bi sbuthathe du qrobo gawoyo d’Suriya.  

Elo Miroğlu mırle calu funoyano; A şartat dmahıtla Darımsuq bi sbutho da droşe dbeyn da 2 rişone, latne munasıb lu cedolo da esore dbeyn Turkiya u Suriya. İ ytawtathe’ste, layba dmisomo meqım ma guboye gawonoye udi rişqutnutho d’Turkiya. A droşani dmisomi’ste, heş belhude bu maşıqlo du rehabilitasyon’ne. en dothe Kemal Kılıçdaroğlu dqomır a guboye, i siyase di baroyutho d’Turkiya gıdmişahlıfo camathe’ste, a esore beyn Darımsuq u Ankara-gıdxulqi ğer şıkıl siyase. 

Me gabo hreno mşalo Turkoyo mawdacle, dhol 40 alfo bnaymothoye d’Suriya dmahzamwolın l’Turkiya mcal fothe du qrobo gawoyo, daciri lu athrathe bıthır mi zalzale dımhewola dukotho frişe du tayman macırbo d’Turkiya bu yarho d’Şbot dşafıcina. An 40 alfo galwoyani’ste daciri lu garbay macırbo d’Suriya bu drabo d’thume frişe xıd Bab al Hawa, Bab al Salam, Tel Abyad uğer.