Al Allusi maglele cali şrolutho du qetro beyn di şultonutho d’Boğdod du qlimo d’Kurdistan

U folitiqoyo Iraqoyo idico qoyumo catiqo Mithal Al Allusi, maglele cali şrorutho da celotho du qetro dkito beyn di şultonutho d’Boğdod udi şultonutho du qlimo d’Kurdistan.

 Lfuth u folitiqoyo Al Allusi, u İran lıkobıc dhowelın a Kurdoye haylo b’Kerxeslox, Ninwe u Diyala, bnişo dhuyo i fnithathe geşro dıkmasırle caman athrawotho d’Suriya u Lebnon.

 U folitiqoyo Iraqoyo idico qoyumo catiqo Mithal Al Allusi, bi maqırhonutho dhule lu ajans da tebe d’Şafaq News, maglele liholo cali celtho du qetro dkito bayn d’Boğdod ud’Arbil, u mırle “i şultonutho d’Boğdod bi netiçe du hboso dıkmisım acla ma grube mzayne uma hayle folitiqoye dıkmısnodi mu İran, kımnasyo bu darbo du qtoco da n’ağre dıturo katfıt du qlimo d’Kurdistan. İ celtho du medano cal da Kurdoye kıtlın haylo b’Kerxıslox, b’Ninwe ub’Diyala. U hano u darboyo dıkamsır u İran cam Suriya hul Lebnon, udıkmidıc bu ışmo du sahro da Şica dıkfılho u İran dhowe bu duyoqayda”.

Al Allusi dkıtyo Maşılmono Sunna, mawdacle ste du İran mnasewole b’şıkıl baroyo dqathle methcadronutho u snodo ma Kurdoye, bnişo dımşatıs u darbano dıkmasırle cam Suriya u Lebnon, elo a’Kurdoye rfıdlın u medano udilonoyith u rişono du gabo demoqratoyo di KDP Mascud Barazani.

Bebzabno, Al Allusi mawdacle di sbuthathe m’atharla b’şıkıl kamilo cala bazare dkito bayn d’Boğdod u Arbil, u mawxaste qtici anağre da fqide du qlimo d’Kurdistan u xliqıste qetre hrene lu qlimo, cal dı Tahran kıbco dmazido u hboso cala Kurdoye, bnişo dmaqıbli bu darbo dışme u sahro da Şica.

Mxasra hreto, u rişwazire du Iraq Mustafa Alkadhimi bu knuşyo dhawile adyawma cami sictho momunoyto du parlamento, makadle dlıgıdtore afqide du qlimo d’Kurdistan dlo ağre, u mırle “lıkowe dmitasiro i sbutho du qtoco da n’ağre cami qale siyasi dkito. Ulıkkowe u barmothoyo d’obe huwwe u timo da fawde dıksaymolın i şultonutho”, mawxa ste Alkadhimi tlıble mi sictho du momuno dmafito i sbuthathe qum di cayno.