Al Kadhımi sımle i socurutho qameyteyde lu İran
Bi socurutho qamayto dsımle u rişwazire du Iraq Mustafa al Kadhım lu İran, hawile ytawyotho frişe cama mşale İranoye bi arişkoyto Tehran; beynothaye u rişqutno Hassan Rohani u Ayatollah Ali Khameney.
Ba droşe dhawın, kıle cali sbutho di tagorutho, di mşaynutho, calu virus d’Corona wa tre gabe m’akadlın, dmafiti la haye aqyome dımdelın camhıdode. Elo u rişono tawdithoyo Ali Xameneyste mzaharle, dıgtolın u hayf du qatlo du rabhaylawotho Qassem Suleymani.
U rişwazire du Iraq Mustafa al Kathımi wi taşdarto da wazire mşahlıfe dkıtwa acme, sımlın athmıl socurutho lu İran. I socuruthatheste, hawyo i socurutho qamayto dıksoyım al Kadhımi xıd rişwazire hatho du Iraq lu athro şbobo du İran. I socuruthathe simo kımo yawme, bıthır mi socurutho dsımle u waziro di baroyutho du İran Javad Zarif li arişkoyto Boğdod uli mditho d’Arbil.
Bu şuroyo al Kadhımi, laqi u rişqutno Hassan Rohani b’Tehran u bıthırste hawile ytawto camu rişono tawdithoyo Ayatollah Ali Khameney. Rohani mawdacle u sabro dkıtle, dıqudri a 2 athrawotho dmazidi i kmoyutho di tagorutho dkito beynothaye l’20 milyare dolare. Meqım şato, u mınyonano 9 milyare dolarewe. Ba droşaniste kıle cali methcadronutho bu haqlo du enerji.
Bu knuşyo dsim lu tbocofroso u rişwazire Iraqoyo mırle; kıtlan sabro dımhathıthina aqyome dkito beyn da 2 athrawotho u acmeyeste u darbo du qtoro beyn du İran udı Basra. Anathrawothaydan, lo belhude kfılği thume elo kıtlınste esore tawdithoye, marduthoye u momunoye. U Iraq ksonıd u İran bu krizano du momuno elo camatheste, u Iraq kobıc mşaynutho u lıkobe aftho l’ayya haylo dmıstacmıl anarcothayde leşan ugzomo du İran.
Lfuth Rohani, i socuruthathe d’al Kadhımi gdımşahlıfo a esore beyn du Iraq u du İran u mdacele, du İran kımşajco li mşaynutho uli şalyutho bu Iraq u bu qlimo kule. Megabo hreno bi ytawto dhawile Ali Khameney cam al Kadhımi sımle Amerika sturyo u mırle; İran lawila u lıkowela ayya niye dımdaxlo ba sebwothoyo gawoye du Iraq u ahna kıtlan ntırto, d’Boğdod dmawfıqo a Amerikoye mu athro. U İran lıktoce u qatlo d’Qassem Suleymani u gıdtole u hayf me Amerika dıqtila Suleymani bu baytathxu u mawdelaste ftiho dhiya qtila.