Al Kazimi mawdacle kito sniqutho l’Amerika bu Iraq

U rişwazire du Iraq Mustafa Alkazimi mawdacle du athrayde gıdfoyış sniqoyo li mcadronutho d’Amerika walawste u snodano kibe dılo mdawım adyawma b’şıkıl dısnodo folhoyo baroyo dcali arco.

 Alkazimi thımleste a şultınwotho dmeqım mene, dhınnene amşale dcali aykanoyutho haruwto dmatila ucdo u Iraq.

 Adyawma meqım mu mazlayde l’Waşington, u rişwazire du Iraq Mustafa Alkazimi bi maqırhonutho dhule mırle; u Iraq heş sniqoyoyo li mcadronutho d’Amerika bu nfoqo mqabıl da tehdide du tukoso marıhbono d’Dacış. İ şultonuthaydi b’fusqono kamiloyo dsaymo şuhlofe bu haqlo di mşaynutho bu zabno dhın grube mzayne ksaymi hjome b’şıkıl yawmoyo calu qentrun di şultonutho bu qlimo Yaroqo b’Boğdod.

Alkazimi bi maqıblonutho dsimo acme mawdacle, du Iraq ucdo latyo sniqoyo l’snodo folhoyo baroyo dcali arco, wu şıkıl di mcadronutho masroyo camu kyono du tehdid dıkloqele u Iraq. Calu şuwolo ida dgıdnoqıl l’Amerika egrotho mu İran bıthır mi socurutho dsımwole l’Tehran, Alkazimi mfanele; ono latno cawodo di posta bu Iraq.

Bebzabno, Alkazimi mawdacle da gunhe dkowın ucdo bu Iraq masrene bışne yarixe di qale dkuyo ma hayle dkıtlın yuthrono mu şğuşyo, u matcanleste imşalutho du medano cala şultonwotho dmeqım mene dımaşelın siyase cjıqto ulo tristo, bnişo dmancımi u haylo di şultonutho du Iraq.

Camgabıdathe, Alkazimi magleleste di şultonuthayde kfulho ucdo leşan dmişakıl sictho celayto masırto camu rişwazire, bnişo dımcaqbo asebwotho rişoye du fasad, da gunhe rabe uda suikaste, u makadleste dgıdmoyıd hşowo ma grube mzayne dıkdayşi u qonuno u me kul farsufo dlıkmakşır bu sutoro da mdinoye.

U rişwazire du Iraq Mustafa Alkazimi kmıntır bi şabthathe dloqe u rişono d’Amerika Donald Trump bi arişkoyto d’Waşington, leşan dmıhthım u dialog stratejikoyo dımşarewole bu yarho d’Hziron dşaficina, bnişo dmihathıthi anesore beyn Amerika wu Iraq.