Al Sadır hawile qroyto dmitabde dialog athronoyo du şuhlofo

U rişono du gabo d’Altayyar Alsadri Muqtada Alsadır, sımle qroyto dmitabde dialog athronoyo du şuhlofo.

Bebzabno, Alsadır sımle’ste qroyto dmitadcıri a mulkone da Mşihoye dmahıt ido aclaye.

 U rişono Şica Muqtada Alsadır, sımle athmıl qroyto dmitafıt la haye u dialog athronoyo du şuhlofo bu Iraq bi mdabronutho d’Emwotho Mhaydotho, u mathkarle’ste da hadome du Bacıth wa marıhbone latte duktho bu dialogano.

U malolo du tbocofroso du gabo d’Altayyar Alsadri Haydar Aljabiri, mawdacle d’Alsadır sımle qroyto dmitabde u dialog athronoyo du şuhlofo, wi şultonutho du Iraq klozım dsaymo i wolithayda bnişo dmınfıq moro li mşaynutho uli morutho du athro.

İ qroytathe d’Alsadır athyo luhwoyo xıd funoyo li qroyto dsımwole u rişwazire Mustafa Alkadhimi dmitabde dialog ftiho u qriho beyn da came mşahılfe du athro, u dmimd u yuthrono du athro udi mşaynuthayde asas du dialogano.

Camgabıdathe, u malolo Haydar Aljabiri mawdacle d’Alsadır sımleste qroyto la sicotho dilonoye dımdawmi a fulhonathe du tedciro da mulkone da Mşihoye. A grube mzayne noqufe du İran, bu darbo du tehdid du camaydan dilonoyith b’Boğdod, kbışwolın ban eşne dşaficina ğalabe ma mulkonayde, wu gabo d’Tayyar Alsadır kmıthım dhuwe’ste kbışle mulkonani du camaydan.

İ qroyto d’Alsadır xıdi qroyto d’Alkadhımi kmıhşowi funoyo li socurutho dsımwole u Papa Mor Fransis lu Iraq, udı tlıbwole ma rişone folitiqoye u tawdithoye du athro, dmisım u sutoro da Mşihoye uda mulkonathe.