Al Sadır mzaharle u Iraq dlomcadıl anesoreyde cam İsroyel

U rişono da Şica bu Iraq Muqtada al Sadır, grışle athmıl u zuhoro du Iraq u d’İsroyel, dılomnasın dımarkıwi u dımcadli a esore beyn dan athrawothathe.

 Al Sadır dsımle sturyo anathrawotho da İmarat Caraboye Mhayde u d’Bahrein, gzımleste u rişwazire d’İsroyel u mırle; U qedomaydox lu Iraq, gıdhowe i haraytaydox!

Bıthır mıd İsroyel mdela qyome cam hın athrawotho du Xaliç leşan dmicadli a esorathe, ucdo u rişono tawdithoyo u folitiqoyo da Şica bu Iraq Muqtada al Sadır, sımle athmıl mamlo bıthır mi slutho d’yawme d’Cruto u mzaharle i şultonutho d’Boğdod u d’Tel Aviv, dlo mcadli a esorathe d’beynothıdıhdode.

Bu mamlayde al Sadır mırle; Me Abdullah Muqtada al Sadır lu bcelıdbobo d’Aloho Benyamen Netanyahu. Kıgoraşno u zuhorathxu, dlothitu lu athraydan u Iraq ulo mıftakrituste dothitu larke u dfuthito rişizgadutho. En dothituste, gıdhuwyo i haraytathxun!

Al Sadır sımle sturyo a İmarat Caraboye u Bahrein cal dımcadelın a esorathe cam İsroyel ba qyome dsimi bi mescoyutho d’Amerika. U rişono Şica mırle; U cedolo da esore haqarayo, Fleşt ba hayeyo bi mcadronuthaydan. U Iraq kıtwole meqım mınyono celoyo d’Yudoye bu athro, elo ucdo naqisi ğalabe uğer daciri l’İsroyel.

U mamlano d’Al Sadır sim xıd funoyo lu rişono du gabo Sunna du Iraq al Ummah-Mithal al Alusi dhuwole meqım şabtho maqırhonutho u dtlıbwole, d’Boğdodste klozım dımcadlo a esorayda cam İsroyel. Al Alusi dıkmidıc dkıtle hzayto folitiqoyto dkıtyo qarıwto lu macırbo mawdacle, dıksonıd u fusqono dan 4 athrawotho Caraboye dfuthi me hatho i rişizgaduthathe b’İsroyel u dımcadli a esorathe cami şultonutho d’ Tel Aviv.

Me gabo hreno u mcadrono du mşalo Amerikoyo dcala esore dcaman athrawotho Caraboye Timothy Lenderking mawdacle, d’Qatar u athro qamoyo du Xaliç, dhuwole aftho l’İsroyel dfutho makthıbo bi arişkoyto Dawha u dkıtla esore cam Tel Aviv.

Walaw Qatar mawdacla dlıkmcadlo a esorayda cam İsroyel hol dlo sofe u şwolo da Fleştoye, u mşalo Amerikoyo mawdacle d’Woşington kıtla ntırto, d’Qatar dımhalqo dawse leşan dımcadlo a esorayda cam Tel Aviv ubi sbuthatheste, Amerika hadırtoyo dımcadro Qatar bı haqle frişe.