Almanya: CDU/CSU u SPD gıdmabden u maşıqlo da droşe leşan şekolo d’şultonutho hathto. I qoyumto du camyadan Reem Alabali mnaqyo me hatho lu parlamento
Bıthır mi zoxutho da guboye gawonoye d’Almanya, Friedrich Merz wu gabayde d’CDU/CSU, gıdmabde droşe camu gabo da Sosyaldemoqratoye d’SPD, leşan dımşakli şultonutho mhayadto. Bu mamlo dsımle Merz dıkmıntır dhowe u rişwazire hatho d’Almanya mırle; Ba yawmotho dıbqamuthayna gıdmabdena a droşe leşan dımşaklina i şultonutho hathto dgımdabro Almanya.
BERLIN – U gabo da Mşihoye Demoqratoye d’CDU u CSU dmıdlın 28.6 ba mo da qole da guboye du parlamento dsimiwo yawme d’Huşabo dşafıcina, gıdmitabde ucdo u maşıqlo da droşe camu gabo da Sosyaldemoqratoye d’SPD dmıdwole 16.4 ba mo da qole, leşan dmişaklo i şultonutho hathto d’Almanya.
SPD cama 2 gabe d’CDU/CSU, gıdhowelın haylo d’sagiyoyutho bu parlamento du athro. Elo SPD notarwo’ste dgımoyadwo snodo rabo ba guboyani. Reem Alabali-Radovan dkıtyo mu camaydan umu gabo d’SPD mıdla 34 alfo 101 qole ubu şıkılano, gıdmdawmo bi wolithayda xıd qoyumto bu parlamento.
Reem mqadamla’ste a tahınyothayda lu snodo rabo dmahwele ela ba guboyani u huwla şudoyo dgımdawmo a fulhonayda leşan i kinutho. U rişono du gabo da Mşihoye Demoqratoye Friedrich Merz bu mamlo dsımle m’akadle, dgımşarın cal qariwo a droşani. Bebzabno kmıntır’ste d’Merz dmibayın u rişwazire hatho dgımoyıd dkuthe d’Olaf Scholz.
Bu zabno da droşani’ste Merz kıtle 3 şwole rişoye dkobıc dımsafelın leşan dımşakıl i şultonutho hathto du athro meqım mu cedo di Qyamto-awkith i siyase di mşaynutho du athro, a galwoye wu qetro du momuno. İ mıştawtıfonutho dla guboyani dkıtwa 82.5 ba mo, ğalabe celoyto’wa u mawdıc, hathe inaqla qamayto’yo bıthır mi şato dan 1987 dkowe hawxa mıştawtıfonutho la guboye. U Huyodo d’Urifi’ste, kımtahqıb me qariwo a guboyani d’Almanya.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
