Almanya kmeydo tedbire mqabıl da maşılmone qaşye

U makthbo du polis Federaloyo d’Almanya dıkhoyır cala hawbe mawdacle, dhol 350 marhıbone d’Dacış daciri l’Almanya me Suriya u mu Iraq.

 Me gabo hreno u bethdino d’Almanya ftıhle bi şabtathe dacwa mqabıl d’149 farsufe dıkmıthomi bi Maşılmonutho qşitho.

Bıthır ma buhone dsımle u makthıbo du polis Federaloyo d’Almanya dıkhoyır cala hawbe, frısle i netije da buhonani u makadle dhol 350 marhıbone d’Dacış daciri naqla hreto l’Almanya me Suriya u mu Iraq.

Zıd me mo ma marhıbonani, kito ithbate qrihe aclaye dmıdlın duktho hfitto bu qrobo dmaşele Dacış b’Suriya u bu Iraq aw dmıdlın yulfono folhoyo leşan dmıştawtıfi lu qrobo. Lfuth u polis Almanoyo, hol 260 marhıbone bnaymothoye d’Almanya qtili bu qrobano dımdawamle bu Iraq u bı Suriya.

80 menayeste mahıtwo remzo aclaye dkıtne qento jıddi li mşaynutho athronoyo d’Almanya, elo a marhıbone hreneste kmifaşqi xıd qento lu athro cal dkıtlın nesyune bıthır mu yulfono zaynoyo dıhzelın u dheş kıtte ideoloji qaşyo di marhıbonutho. Bebzabno bi şatatheste, ftıhle u bethdino d’Almanya dacwa mqabıl d’149 farsufe dıkmıthomi bi Maşılmonutho tuxmonoyto.

Lfuth i mawdconutho dıfriso, a farsufani bu zoyudo barmothoye d’Suriya, Afganistan u ğer athrawothone u kmisım taxmin dkıtne hın menaye farsufe ma ğrobe marhıbone d’Dacış. Bi mawdconutho dıfriso mu bethdino federaloyo, kito bethdine mşahılfe mqabıl da farsufani. U menyono da thimoye bi Maşılmonutho qşitho lfuth a eşne d’şafıc, zayıdi ğalabe bu athro d’Almanya.