Almanya rfıdla u talab d’Turkiya dmitaslamla u kathowo Abdullah Aymaz

Almanya rfıdla u talab d’Turkiya, dmitaslamla u kathowo saqıbloyo di şultonutho du rişqutno Recep Tayyıb Erdoğan-Abdullah Aymaz.

U talabano d’Ankara mqadım yawmo, bıthır mıd Almanya maglewola di şultonutho d’Turkiya kıtla lohitho d’ışmone d’Turkoye saqıbloye dıkhoyın b’Almanya, dkito plan du qatlathe.

İ wazirutho di gawoyutho d’Almanya athmıl m’akadwola bu parlamento du athro,

d’Turkiya kıtla lohitho d’ışmone d’Turkoye saqıbloye; beynothaye kathowe, gelyunore uğer dıkhoyın ucdo b’Almanya, dmahti nişo lu qatlo. Hathe inaqla qamayto’wa di şultonutho d’Berlin mahkelwola cali şrorutho di lohithathe da Turkoye hfite dıkhoyın b’Almanya, dkıtla Ankara plan dmıqtoli.

Elo adyawma’ste fris tebo b’Almanya calu kathowo Turkoyo Abdullah Aymaz dıkhoye b’Almanya u d’Ankara tlıbla dmitaslamla’yo mcala hawbe frişe dsımle. İ şultonutho d’Berlin rfıdla u talabano d’Ankara u m’akadla, dlatla niye dmadcırole l’Turkiya.

 İ egarthathe dımşadro mu waziro di kinutho d’Turkiya Murat Karagöz mfanyo me Almanya u mawdıc, du kathowo barmothoyo’yo u lıkmitaslım l’Turkiya cal dkıtyo hano qonuno du nomuso esonoyo du athro. U kathowo dkıtyo cımre 76 eşne, kıtwole esore camu zawco d’Fethullah Gülen wu  hathe latyo inaqla qamayto d’Turkiya kıtulbo dmitaslamla u kathowano.

 Me gabo hreno, sbutho d’xlıqla zmomo bu tbocofroso du Swed u dbritho, i dacwa du İranoyo dmawfıq lu bethdino d’Stockholm’yo. U İranoyo msıkwo ba 2019 bu bethtawso du Swed ma thome du hawbo du qatlo dban alfayo folitiqore hbişoye bu İran ban 1988. U bethdinano dıkmıntır dımdawım ba yarhe, kmifaşıq xıd hda ma dacwat Emwothoye rabe dsimi bu Swed.