Amerika gıdımdawmo dfayşo b’Suriya

WASHİNGTON – Bu knuşyo dsımle u Mawtbo Tahtoyo di kongre d’Amerika, mıdle li ido i rmoyto dıktulbo mu rişono Joe Biden, dgorış a folhathe me Suriya. Elo bu quwolo dsim, 321 qoyume lo maqbelın i rmoytathe u belhude 103 m’aydolın. Bu dumyano, maklıyo i rmoytathe dımqadmo leşan dmıgroşi a 900 folhe Amerikoye b’zabno d’180 yawme me Suriya.  

Mawdıc, d’en Amerika dmıgroşo me tamo kito qento rabo d’Dacış dı docır me hatho u dımşakıl qento u gzomo hem l’Amerika u hemste a bnay’qyomayda. Walaw Dacış ğlib, a krılyothayde kımdawmi dsaymi hçome b’Suriya ubu Iraq. Ba droşe dhawi cali rmoytathe, u mşalo di Sictho da esore baroye bu Mawtbo Tahtoyo Michael McCaul m’akadle, d’Amerika wa bnayqyomayda qtilın ba 2022, 466 marhıbone Dacış u msıklın 250 hrene.   

U groşo da folhe Amerikoye me Suriya, kibe dmisım inaqla dmıqşıc Dacış kamiloyith. Hadomo hreno di Sictho mu gabo da Demoqratoye Gregory Meeks mawdacle i saqıbloyuthayde lu fyoşo da hayle Amerikoye b’Suriya elo u mathlono Ryan Zinke mırle; “İ şrorutho dkito casqoyo. Ya gıdımharbinalın tamo, yaste harke u calathe komarno; tawtıryo dımharbinalın u dğulbinalın b’Suriya ulo ba zabuqone du athraydan Amerika.”  

U rabhaylawotho gawonoyo du gayso Amerikoyo Mark Milley, sımwole meqım şabtho dlıkmıntorowa l’Suriya, leşan dmalım mawdconutho cali aykanoyutho du ağuno dkobın cama bnayqyomathe d’QASAD mqabıl d’Dacış.