Amerika gıdobo 15 milyune l’kul mawdconutho dkiba dmitıstacmılo leşan u msoko d’Maduro

Amerika gıdobo 15 milyone dolare, lu ha dkıtle mawdconutho leşan u msoko du rişono d’Venezuela Nikolas Maduro uğer mşale du athro.

 Umqımdino d’Amerika mawdacle d’Maduro wamşale hrene, kmıthomi bi asirutho dcama şabakat Emwothoye du zebono lo qonunoyo da galwoye mtanwone.

Me darbe d’Amerika dımsafyo u şwolo du virus d’Corona, kıtucno ğamo calu rişono d’Venezuela Nicolas Maduro. Bi mawdconutho dhuwle u mqımdino d’Amerika William Barr m’akadle, d’Woşington fsıqla dımbayno Venezuela xıd athro dıksoyım sponsor i marhıbonutho.

I wazirutho di baroyutho d’Amerika, thımla u rişono Maduro uğer mşale bı darğo celoyo d’Venezuela bi asirutho dcama şabakat Emwothoye du zebono lo qonunoyo da gelone mtanwone. Calathe i mdabronutho d’Trump mawdacla, dhadırtoyo  dobo 15 milyone dolare luha dkıtle mawdconutho leşan u msoko d’Maduro.

Mawdıc d’Woşington gıdobo 15 milyone l’kul mawdconutho dkiba dmitıstacmılo leşan u msoko d’Maduro u camaniste, gıdobo 10 milyone li mawdconutho dgımotela leşan u msoko 5 mşale hrene; beynothaye u rişono du Mawtbo athronoyo, u mcadrono du rişono u rişono catiqo du gayso Cordones uğer.

Lfuth Amerika, Venezuela huwla aftho la hayle d’FARC dmıstacmıli a thume oyaroye du athro leşan u nqolo da gelone mtanwone la thume d’Amerika. I mdabronutho d’Venezuelaste baroyo rfıdla a thomani u mawdacla, dlatte arcutho. Dothe Maduro dmımsık me Amerika, gıdmitahwele 50 eşne hbuşyo.