Amerika gıdobo 9.7 milyone dolare laşan a guboye gawonoye du Iraq

Leşan u tuyobo da fulhone udi hedriye da guboye gawonoye du Cıraq, mqadamla Amerika 9.7 milyone dolare lu tukoso d’Emwotho Mhaydotho lu snodo du Cıraq-UNAMİ.

Me gabo hreno u Huyodo d’Urifi m’akadle, dgıdobe 8 milyone hrene lu Cıraq, leşan a fulhone du tendifo du athro ma maynat-ma foqucotho di arco, dmahtiwo bu zabno du qrobo dbeyn du Cıraq u İran ban 1980’yat.

İ rişizgadutho d’Amerika dkıtyo b’Boğdod mawdacla, d’Woşington huwla 9.7 milyone dolare l’UNAMİ, leşan u snodo da fulhone tekniki da guboye gawonoye du Cıraq dgımisomi bıthır 2 yarhe. İ mawdconutho hiwo, bıthır mi ytawto dhawyo beyn du rişwazire du Cıraq udu rişono Amerikoyo b’Woşington.

İ mcadronuthathe’ste hiwo, bu taro du snodo d’Amerika lu duyoqo di mşaynutho da mtagliyone, da hfite, da neşe, da gelyunore u dmimıd hşowo ma farsufe dıksaymi hawbe mqabıl di noşutho. UNAMİ matiwola’ste milyon euro me Fransa u Almanya leşan a fulhonani da guboye du Cıraq.

Bi mawdconutho dhuwle u malolo du koalisyon Emwothoyo m’akadle, mi şato da 2014 uholucdo-bu ağono dhiw mqabıl da marhıbone d’Dacış, mqadamle u koalisyon hol 5 milyare dolare la hayle di mşaynutho du Cıraq. meqım şabtho’ste huwle u koalisyon alat u lojistik bu timo d’35 milyone dolare la hayle Cıraqoye.

Elo camgabe du snodo folhoyo, u rişizgado du Huyodo d’Urifi bu Cıraq Martin Huth m’akadle dgıdobın 8 milyone euro l’UNMAS-dkıtyo u tukoso Emwothoyo dıkmahrıw a foqucotho di arco. A zuzani gıdmitahwın lu tukoso, leşan dmandıf u Cıraq ma maynat dmahtiwo bu athro bu zabno du qrobayde camu İran uma marhıbone d’Dacış.

Kito hol 3 alfo dukotho dheş kibın foqucutho uba gedşe da furqoce dhawın ma maynatani, qtil 13.456 bnaynoşo mi şato dan 1991 uholucdo. Bebzabno mawdıc, dqtil 6 Cıraqoye bu zabno du hçomo dsim calu zawho du cufoyo b’Salahaddin u 23 hrene mçarhi. A marhıbone d’Dacış mıdde i mşalutho du hçomano dcala mdinoye.