Amerika gıdturyo 900 ma folhayda b’Suriya leşan u snodo da Haylawotho d’Suriya Demoqratoyto

İ malılto di wazirutho du sutoro d’Amerika rabathhaylawotho Jessica McNulty m’akadla, d’Amerika gıdturyo 900 ma folhayda b’Suriya leşan u snodo da Haylawotho d’Suriya Demoqratoyto.

McNulty mawdacla’ste, d’sahmo ma folhani, gıdfayşi bi foqudutho d’Al Tanıf dkıtyo bu tayman madınho d’Suriya.

Bi maqırhonutho dhuwla athmıl i malılto d’Pentagon-rabathhaylawotho Jessica McNulty m’akadla dfsıqlın, dtorın 900 folhe Amerikoye b’Suriya. McNulty mırla;

Amerika gıdfayşo bu garbay madınho d’Suriya ubi foquduthayda dkıtyo b’al Tanıf bu tayman madınho du athro.

McNulty mırla; U dawraydan u rişoyo b’Suriya, dım’akdina u qşoco da ğrobe marhıbone d’Dacış’yo. Amerika masırto’yo kamiloyith bu ağono dıkmitahwe mqabıl di marhıbonutho u calathe gıdhowela ithutho folhoyto bu garbay madınho d’Suriya ubi foqudutho dkıtyo b’al Tanıf.

Jessica McNulty kımmo; U koalisyon Emwothoyo dkıtyo bi rişonutho d’Amerika, gıdmdawım a fulhonayde cama hayle muttafik; beynothaye Haylawotho d’Suriya Demoqratoyto. Amerika gıdmdawmo u snodayda la hayle qlimoye u gıdkulyo mqabıl dkull mkono, dmaqwe u tukoso marhıbono d’Dacış ruhe naqla hreto.

7 bu yarhano’ste u Qusro Heworo mawdacwole, du rişono Joe Biden mawraxle şato hreto cala tedbire dmahtiwo cal Turkiya, cala hçome dıksaymi a folhayda calu garbay madınho d’Suriya ubu şıkılano, kobın husrono li kampanya mqabıl d’Dacış.