Amerika kımdawmo dıtıhmo u athro du Sin

Bıthır mu nfoqo du kewo di Corona dımbarbız bı britho, nafıq li holo i qale dkito beyn lu Sin u l’Amerika man gıdmbayın imdabronutho wu şıkıl da haye hathe da bnaynoşo.

 Ba yamwothani, kull ha menaye ksoyım maqırhonutho dıkımhadıd u hreno u kull ha meneyeste kımahıt a fawde bıqdole du haylo hreno. Wu kewo di Corona kımdawım dhowe celtho lu mawto da bnaynoşo.

Amerika ba maqırhonwotho dıksaymo, kıtuhmo u Sin dkıtyo bıthre du kewo d’Corona udı bi idactho trele dmibarbız b’britho. Me gabo hreno, u Sin mawdacle dkıtle 4 şıkılat d’darmone dkibe noqelın l’britho kula b’time şwayo awkith raxis en dhowe snodo me ğer athrawotho.

Me gabo hreno Amerika, mahwela hfuxyo qaşyo mqabıl du qonuno dkobıc mahıt u Sin cali mdabronutho d’Hongkong, dıkmanqıs i şaryutho wi hirutho di marcitho u kımmo; En u Sin dmafıt u qonunano la haye, gıdmaqşena a dubore awkith a tedbire dımqabıl du athro. Bi maqırhonutho dhuwle u Sinste mırle; Amerika klozım dtıryo ma thomani dıksaymo mqabıl du Sin, dılo bi harayto ahnaste gıdobinala funoyo.

Bi sbuthathe dmadıcrina u zabno l’meqım şato u zıttır, u dmamtena lbolayna mınwa i qale beyn du Sin u d’Amerika, kıtwo qale du xat du telefon G5. Kothe u şwolo; I qalayo’yo dıkmdawmo ucdo u d’matyo l’duktho dhawyo ftıhto, man gımdabır britho. A yadıcthone wa folitiqorre kımmi britho lıkducro xıd meqım elo gıdmaydo darbo hatho da haye.