Amerika krıhla ahjome dsimi b’Rişcayno u b’Kobani

Amerika krıhla ahjome marhıbone dsimi b’Rişcayno u bi fnitho d’Kobani bu garbiyo d’Suriya, u sımla qroyto la gabe kulle dyıtwi la bazare du şroyo folitiqoyo.

 Me gabo hreno, imdabronutho yothoyto dıtlıbla m’Rusya u m’Amerika dkolın mqabıl da hjome dıksaymolın Turkiya, a neşe di mditho d’Qamışliste layimi qum du benyono d’Emwotho Mhaydotho u mahwelın u hfuxyathe mqabıl da hjome dsimi cal Kobani.

 İ wazirutho di baroyutho d’Amerika bu buyono dıfrısla lu tboco froso, krıhla u hjomo marıhbono dsim athmıl bi qastra dı Tel Halaf bi mditho d’Rişcayno, wu hjomo dsim cali qritho d’Halanç bu tayman madınho d’Kobani bu garbiyo d’Suriya. İ baroyutho d’Amerika dmahwela awyutho rabtho cama yaqrotho da qtiloye uda mjarhe, sımlaste qroyto la gabe kule d’Suriya dyıtwi la bazare du şroyo folitiqoyo, u mırla “u dewam du cnufyo kmacıq u sabro dkito lu şroyo du kriz du athro. U naqla hreto kımkarırina u snodaydan u rabo laqroyotho dsimi mu notarozo gawonoyo d’Emwotho Mhaydotho Antonyo Guteres umu mathlono dilonoyo d’Ewmotho Mhaydotho b’Suriya Ger Pedersson laşan baroyo dmisım şalyuthzayno b’Suriya. Ube bzabno, ksındina afulhone dıksamlın Pedersson bnişo dmıftıh u darbo bıfşitutho qum du şroyo folitiqoyo du kriz d’Suriya lfuth u fusqono da 2254 du mawtbo di mşaynutho d’Emwotho Mhaydotho”.

Me gabo hreno, i mdabronutho yothoyto du garbiyo udu madınho d’Suriya b’qaşyutho krıhla u hjomo dsımle u gayso kaboşo dı Turkiya cali fnitho d’Kobani, u mawdacla du medano dyoşoyo la qonune u la qyome haroye di awyutho dkito bayn Rusya, Amerika u Turkiya. Bu buyono dıfrısla imdabronutho yothoyto, tlıbla m’Rusya, m’Amerika umu tukoso d’Emwotho Mhaydotho dmahti klayto qrıhto mqabıl di siyase bceldboboyto dkımaşyola Turkiya bu athro d’Suriya.

Camgabıdathe, i mdabronutho yothoyto tlıbla ma came du garbiyo udu madınho d’Suriya dkıtne lawğıl u larwal du athro, dımtaybi tagılyotho camonoyo mqabıl da hjome uda dyoşe dıksaymo Turkiya mqabıl da came du qlimo.

Mxasra hreto, ba mowat d’neşe mıştawtaflın li taglitho dımtaybo qum du qentrun d’Emwotho Mhaydotho bi mditho d’Qamışli, u krıhlın u hjomo dsim cali qritho d’Halanç bi fnitho d’Kobani.

Ba lohiyotho u pankarte dıtcınlın amtagılyone, mawdaclın du faşist dı Turkiya tehdid li mşaynutho tibeloytoyo, uba slogane dmazcaqlın tlıblın ma tukose emwothoye da zedqe noşoye dmaydi hşowo m’Turkiya cala gunhe dıksaymolın bhaq du camo du garbiyo udu madınho d’Suriya.