Amerika mafıtla atedbire hatheyda calu İran

Athmıl yawme d’Şabtho, makıd d’Amerika gıdmahto naqla hreto a tedbire kulle dımbayniwola meqım Emwotho Mhaydotho calu İran. Bi sbuthatheste, mahwele u waziro di baroyutho du İran Javad Zarif hfuxyo qaşyo.

 Mxasra hreto cali bcelıdbobutho dkito beyn da 2 athrawothani, u İran gzımle Amerika u mawdacle, dgıkurxi cal kul Amerikoyo dhawile sawco bu qatlo du rabhaylawotho Qassem Suleymani.

Amerika, naqla hreto nafiqo mqabıl dı britho u mafıtla tedbire calu İran. Washington madcarla u mafıtla naqla hreto la haye, a tedbire Emwothoye dmahtiwo meqım calu İran. U waziro di baroyutho d’Amerika Mike Pompeo huwle i mawdconuthathe, walaw a hayle hrene dı britho mqabıl du fusqonanowın.

Bebzabno Amerika grışla u zuhoro da hayle kule dkıtyo hadırto dmahto tedbire aclaye, en dılo mtabqi u fusqonano. Bu mamlo dsımle Pompeo mırle; Amerika bı fsihutho kmıstaqbılo u tebo dathmıl, bi sbutho du tedciro di sagiyoyutho da tedbire Emwothoye dmahtiwo cali şultonutho d’Tehran.

U qetro da tedbirani dmahti calu İran, dılo u Sin, Rusya wan athrawotho hrene muttafik d’Amerika b’Urifi kımaydi u fusqonano d’Washington. A tedbirani calu İran, maqimiwo bıthır mu qyomo du nukleer dımdewo ba 2015 beyn Tehran, Amerika, Sin, Rusya, Fransa, Britania u Almanya. Bu qyomanoste, kmımnıc u İran d’sonıc zayne nukleer.

Cala tedbirani dfayiti naqla hreto la haye, hem u waziro di baroyutho du İran Javad Zarif u hemste Rusya mahwelın hfuxyo u İran mzaharle dgıdobe funoyo qaşyo. Bebzabno b’tebo hreno dıfris cali mwatyuthathe beyn du İran u d’Amerika, u rabhaylawotho da Noture du Qawmo du İran Hussein Salami mırle; Rişono Trump, u tloyaydan du hayıf calu qatlo sohdaydan Qassem Suleymani, qriho, şariro u jıddi’yo.

Salami makadle u mırle; En dmohın b’ahna b’ayya şıkıl, gdımfanena alfo naqlat qşeytır. Hadirena dgıkurxina cal kul Amerikoyo dhawile sawco bu qatlo du rabhaylawotho Qassem Suleymani, dıqtılwo bu şuroyo di şatathe b’Boğdod du Iraq ma folhe Amerikoye. Salami, rfıdleste u tebo dıfris dkıte plan d’qutli i rişathizgadto Amerikoyto Lana Marks.