Amerika mahıtla tedbire calu endüstri du farzılo du İran

Amerika kımdawmo dmahto tedbire calu İran, bnişo dımzawro u momuno du athro. Ucdoste mahıtla Woşington tedbire hathe calu endustri du farzılo du İran.

 Bi maqırhonutho dıfrısla athmıl i wazirutho di Xazina d’Amerika makadla, dmahıtla tedbire cal 17 şırak dıksunci farzılo bu İran.

U waziro di baroyutho d’Amerika Mike Pompeo huwle athmıl maqırhonutho u makadle, d’Woşington mahıtla tedbire casye cal 17 şırak dıkfulhi bu haqlo du farzılo bu İran. Pompeo mırle; U rejim du İran kmıstacmıl a mabucayde du haqlo du farzılo leşan u snodo da rejime hrene dıkmahrıwi i mşaynutho b’britho.

Bu mamlayde Pompeo mırle’ste; 2 ma şırak, kudcina mzabanlın, nqilın u matilın snodo mu İran. Beyn da şırak dmahıt tedbire aclaye kito-şırke dkıtyo b’Almanya, hdo b’Britania u hreto dkıtyo bu Sin. A şırak kulle kmidabri mu İran u calathe Amerika, gıdmdawmo dmahto tedbire casye calu rejim du İran dıksonıd i marhıbonutho.

A tedbirani d’Amerika, mşarewolın ba 2018 bıthır mu groşayda du qyomo dımdewo ba 2015 beyn du İran uda 6 hayle rabe dbritho. İ m’watyutho dxliqowa bıthır beyn Woşington u Tehran, hawyowa celtho lu qatlo du rabhaylawotho İranoyo Qassem Suleymanib’Boğdod dthımwo me Amerika bu snodo da hçome dıkmisomi calan Amerikoye bu Cıraq u b’Suriya.

Yawme d’Tre d’şafıcina, mşarewole u İran dmazıd hol 20 ba mo, bu snoco du uranium bu macımlayde dkıtyo tahte di arco. İ kmoyuthathe kmifaşqo xıd dawse hreto lu şuşoto du snoco da zayne nukleer. Meqım kmo yarhe, mahıtwola Amerika tedbire calu gayso İranoyo, cala şutosayde da istixbarat ubu haqlo du enerji du İran.