10/07/2021

Amerika mahıtla tedbire momunoye cal 34 şırak u şutose u farsufe du Sin

İ şultonutho du rişono Amerikoyo Joe Biden, mahıtla 34 şırak, şutose wu farsufe hrene du Sin, bi lohithayda da tedbire momunoye.

A tedbirani’ste mahti bu taro da dyoşe dıkmisomi cala zedqe noşoye u cali goşuşutho dıkmisomo bu darbo du nawlo b’Xinjiang.

Amerika mahıtla 34 şutose frişe du Sin bi lohithayda da tedbire du momuno; beynothaye 14 şırak, dıkmıthomi bi sawco dkıtte cala dyoşe da zedqe noşoye bu qlimo d’Xinjiang. Bu taro da tedbirani, mahıtla Amerika mnoco cala şırak du athro dmaşın esroe u tagorutho cama şırak Sinoye.

Hın ma şutosani dmahıt tedbire aclaye, kito’ste şırak dıkmıthomi bu snodo folhoyo du Sin, du İran u d’Rusya. Hın ma şırak dmahti bi lohithathe bu Sin’ne, 6 b’Rusya, wa hrene’ste b’Kanada, İran, Lebnon, Hollanda, Pakistan, Singapore, Qore i Taymnoyto, Taiwan, Turkiya, ba İmarat Caraboye u b’Britania’ne.

Amerika mahıtla’ste mnoco du zwono du Kıttono, da yabruhe uğer mluwe u muklone dıkmizabni me Xinjiang. Woşington sımla u Sin sturyo ğalabe naqlat calu şıkıl du qedomayde la zedqe noşoye-dilonoyith mqabıl da qalilotho, dıkjobır u camo lu şuğlo, dımaqımle i hirutho b’Hong Kong u dıkmdawmo ba gzomayde mqabıl d’Taiwan.

Camgabe d’Amerika, u Huyodo d’Urifi, Kanada u Britania’ste mahıtte meqım tedbire cal mşale Sinoye calu şıkıl du qedomathe la qalilotho; beynothaye a Uğur dkıtyo camo Maşılmono. U Sin-lo belhude mqabıl da Maşılmone’yo, elo kıdoyş’ste a Mşihoye du athro u kırofıd i hirutho tawdithoyto.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…