Amerika mahıtla tedbire mqabıl dha mşalo du rejim d’Suriya

Amerika mawdacla d’Rusya qtila ba casrowat d’folhe Turkoye ba cuqobe folhoye dsımla bu athro dı Turkiya.

Me gabo hreno, Amerika mahıtla tedbire mqabıl dha mşalo du rejim d’Suriya cala gunhe du cnufyo dsımle b’gawıd du athro.

U waziro di baroyutho d’Amerika Mayk Pompeo mawdacle di mdabronutho d’Waşington kmıtyaqno d’Rusya qtila ba casrowat d’folhe Turkoye ba cuqobe folhoye dsımla Mosko bu athro d’Suriya.

Pompeo bu knuşyo dsımle athmıl lu tboco froso mırle “Amerika kdırşo ucdo dımqadmo mcadrınwotho l’Turkiya dkıtyo i şorıktayda bu NATO bıthır mdıqtil ba casrowat ma folhayda b’Suriya”. Elo Pompeo lımawdacle ayko u ema qtili a’folhani dı Turkiya.

Bu yarho dşaficina, ahaylawotho du rejim d’Suriya ba hjome oyaroye dsımwolın cali fnitho d’İdlıb, qtiwolın bu noquso 34 folhe Turkoye.

Megabo hreno, u waziro di baroyutho d’Amerika mawdacle d’Waşington mahıtla tedbire calu waziro du sutoro d’Suriya cali Cabdalla Ayyub, cal dsımle gunhe du cnufyo b’gawıd d’Suriya.

Be bzabno, Pompeo mawdacle dmahıtste tedbire Amerikoye mqabıl d’9 şutose bu tayemno d’Afriqya ubu Sin cal dımqadamlın mcadronutho lu İran.

Camgabıdathe, Pompeo mawdacle di şultonutho du İran kdırşo ucdo i sbutho du terfiyo dhın ma barmothoye Amerikoye hbişoye, mi celtho du virus d’Corona.

Cala hbişoyani, Pompeo mırle “kıtlan idactho da İranoye kmıftakri ucdo dmarfın ahbişoye Amerikoye aw lo. Klozım kul noşo dodıc d’ahna kfılhina lu medano, wucdoste xıd meqım b’şıkıl ftiho ksaymina esore acmaye, laşan dmitarfın ahbişoye Amerikoye kulle dıhbişi bdıhılmiye bu İran. Kito qento cala hbişoyani bi netije du mede dkowe bu İran”.