Amerika mahıtla u rişono da Çeçen bi lohitho di marhıbonutho

İ wazirutho di baroyutho d’Amerika, mahıtla u rişono di qutnutho d’Çeçenia Ramzan Kadyrov bi lohithayda i kımto. U mşalo Çeçenoyo kmıthım ba hawbe du dyoşe da zedqe noşoye uba hawbe da taşniqe uğer.

 İ wazirutho mawdaclaste, di barthzawgo d’Kadyrov wa tarte bnothaydeste mahıt mnoco aclaye dcubri l’Amerika.

İ wazirutho bi baroyutho d’Amerika mahıtla u rişono di qutnutho da Çeçen Ramzan Kadyrov bi lohithayda i kımto cala hawbe dsımle bu dyoşe da zedqe noşoye uda hawbe da taşniqe, da qatle uda dyoşe hrene dsimi hani 10 eşne. Kadyrov heş me meqım mahıtwola Amerika tedbire momunoye acle. Rusya’ste kmıntır dmawdıco u hfuxyayda lu fusqonano d’Amerika.

İ wazirutho mawdacla, di barthzawgo d’Kadyrov wa tarte bnothaydeste mahıt mnoco aclaye dcubri l’Amerika. U waziro di baroyutho Mike Pompeo bi maqırhonutho dhuwle mırle; U fusqonano mid, cali mudaxala dhawile Kadyrov bu dyoşo da hawbe noşoye b’Çeçenia u kıfoyıtste cali iqarthayde.

Xıd funoyo li maqırhonuthathe d’Pompeo, Kadyrov frısle egartho bi dafayde ubı idothe 2 zayne yaqure u mırle; Pompeo, ahna hadirena dımharbina. Ucdo gıdbosım u mede! Elo Kadyrov bı dafo kenşoyto du athro kımşayıl me Amerika, qay mahto i athto wa 2 bnothayde bi lohithathe u thımle Amerika ba dugle uba provokasyone.

U fusqonano d’Amerika mid, 2 şabe bıthır mıd 2 Rusoye me Çeçenia msikiwo b’Austoria qtiwolın Çeçenoyo hreno b’Linz. Bu şuroyo di şatathe’ste qtılwo bşıkıl barbroyo u mşalo di saqıbloyutho d’Çeçenia bı mdito d’Fransa. Kadyrov dkıtyo qariwo lu rişono d’Rusya Vlademir Putin, mdabarle Çeçenia mi şato da 2007 uholucdo u kmıstacmıl ğalabe ma taktike d’Mosko.