15/02/2021

Amerika mahwela hfuxyo calu qatlo da Turkoye bu turo d’Gare

Ba yawme dşafıcina ba cuqobe dsimi calu turo d’Gare cali duktho da hayle du gerille di PKK, qtil 13 farsufe Turkoye.

 Calu qatlano kito maqırhonwotho u iddicat frişe mi PKK u mi şultonutho dı Turkiya. Wi wazırto di baroyutho d’Amerika frısla egartho bhaq di sbuthathe.

I wazirutho di baroyutho d’Amerika frısla maqırhonutho calu mawto da 13 barmothoye d’Turkiya bu zabno da cuqobe dsimi cal maşritho bu turo d’Gare dkıtyo bu garbiyo du Iraq.

Bi maqırhonutho dıfriso bu twitter du malolo di wazirutho di baroyutho Ned Price  kmitawmır “Amerika hzinoytoyo calu mawto da barmothoye Turkoye bu qlimo d’Kurdistan du Iraq. Ahna su muttafikaydan du NATO s’Turkiya’na. kımqadmina a buyoeydan la eqaryotho da farsufe dıqtili ba taxtuşe haroye. Ida dmişarır u tebo da mdinoye Turkoye qtili mu taraf di PKK, u medano gıdkırhinale b’qaşyutho”

U şıkıl di maqırhonutho d’Amerika kminahlo d’Amerika latla tuxlono b’Turkiya, midıd u kroho kmitasır bşart, bu şıkılano kmahwiyo latla tuxlono li maqırhonutho ruşmoyto dı Turkiya.

Bıthır mi maqırhonuthathe d’Amerika u rişqutnu d’Turkiya Recep Tayyip Erdoğan mahwele hfuxyo u mawdacle, ida gıdımdawmi cam hdode bu NATO, lıklozım dhowın cam gabıd di PKK, YPG u PYD. Mın dımitu hatu ksınditune.

Atre tarafe i PKK u Turkiya kıtlın iddicat mşahılfe calu mawto da 13 farsufani. U waziro du sutoro dı Turkiya Hulusi Akar mawdacwole, bu zabno dsim kroxo bıhdo mcartho b’Gare, mqafelın şlade dı 13 farsufe. Sımwole iddica a bnaymothoye Turkoye dkıtwın dılo zayne 12 mınayye mıhe buğre brişaye u haste mıhe buğro bkatfe u qtili. Bıthır mi maqırhonuhathe nafıq li holo a 13 farsufani folhe, pwelıs u falohe du MİT’wın u latwın mdinoye.

Elo bhaq di sbuthathe i PKK mawdacla. Tlotho yawme cal hdode sim hjome da foqocotho, bi maşritho u larwal hawi taxtuşe qaşye. U medano hawi sabab mınyono ma yasire folhe, pwelıs wa goşuşe du MİT dkıtwın yasire qtili.

Bi maqırhonutho dıfriso mbayınste, farsufo dkıtle ışmo idactho folhoyto kodıc, bu şıkıl du hjomo dsim cali maşritho noşo dxolıs huwe ba haye. I mcartho wi maşritho dkibowa yasire midi nişo, u cuqobo latwe leşan du texlisathe elo leşan dmıqşoci bnaqla hdowe.

I PKK kmawdıcoste a farsufani hani ışne yasirene sidayye, u lo sımme mede bınne u lo hınne qıtlilın. I PKK hani ışne kmısko yasire dkıtne folhe, pwelıs u bıthır bi mıscoyutho dşutose kenşoye kıtrane hire.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…