Amerika maklela u snodeyda la cuqobe dıkseymowa Turkiya cali PKK

Amerika maklela u snodo folhoyo ğnizo dkobo’wa hani eşne l’Turkiya, leşan dsaymo cuqobe calu gerilla di PKK. U fusqono du tekliyo du snodano d’Amerika l’Ankara mid, cal d’Turkiya kbışla dukotho frişe du garbyo udu madınho d’Suriya’yo.

 I mawdconuthathe hiw me arbco mşale Amerikoye lu ajans da tebe d’Reuters.

 I m’watyutho beyn Woşington u Turkiya, kımahwe camıqtır mu mede dıkmahwın’yo. Lfuth i mawdconutho dhuwlın 4 mşale Amerikoye lu ajans da tebe d’Reuters, Woşington maklela u proğramayda di methcadronuthayda da istixbarat dhuwla hani eşne l’Turkiya, leşan dı qudro dmıoyo baroyo ba dukotho du gerilla di PKK.

 U fusqono du tekliyo di tahraztathe’ste dgımdawım hol dmimıd fusqono hatho, holucdo lo mawdacwo lu tbocofroso u mid, cal d’Turkiya kbışwola bu yarho d’Teşrin u qamoyo dı şafıcina u garbyo u madınho d’Suriya. Hathe’ste kımadilo bı qrihutho, cala esore hariwe dkito adyawma beyn da 2 athrawotho hadome bu NATO.

An 4 mşale dtlıble me Reuters dlo mitawdıc ışmonaye cali hassasiye dkito bi sbuthathe mawdaclın, d’Amerika maklela a fyore da tayosyothayda di goşuşutho dımcaqbiwo i harake du gerilla di PKK ba turone du garbyo du Cıraq. Elo i malılto du Qusro Heworo labico dobo fuşoqo bi sbuthathe u mırla; Ahna lıkobina mawdconutho cala cuqobe dıksaymina,

Bebzabno, tlib’ste mi wazirutho du sutoro d’Turkiya dobo fuşoqo bi sbuthathe rfıdla dobo mawdconutho, elo mşalo Turkoyo dlo mawdıc ışme-m’akadle dmaklıyo i tahraztathe d’Amerika, leşan dmıkşofi a thume/u haylo dkıtla Turkiya bu haqlo folhoyo uda istixbarat.

Ha ma mşale Amerikoye’ste mırle; Turkiya gıdgurşo casqutho rabtho ba cuqobayda cali PKK bıthır mıd maklıyo i mcadronuthathe d’Amerika. Trump dkobıc dgorış a folhayde me Suriya, sim ğalabe naqlat sturyo ma Demoqratoye u hemste ma Qutnuthoye cal dtrele a hayle d’SDF-dkıtne hayle bnayqyomo d’Amerika bu ağuno mqabıl d’Dacış, cal idothaye u fothaye u dhowın nişo la hçome d’Turkiya.