Amerika maqşela a tedbire mqabıl du athro du İran

Qoyume di kongre d’Amerika, mawdaclın dkımtaybi ucdo tarmitho d’qonuno laşan dmitahıt a tedbire qaşye dkulle mqabıl du İran udmitaklın a fulhonayde a marıhbone.

Me gabo hreno, u bethdino du İran hkımle bu icdam du qatlo d’farsufo dıkmıthım dkıtyo goşuşo, u dhule xabro la istixbarat Amerikoye cali duktho du rişono d’Faylaq Alquds Qasem Sulaymani.

 I tarmitho du qonuno dıkmitaybo m’qoyume Qutnuthoye bi kongre d’Amerika, kıtla u nişo dmakılyo i marıhbonutho du İran udmıshıf u momunayde kulonoyith bu darbo da tedbire momunoye. Ubebzabno, i tarmitho du qonuno ktılbo dmitaklın amcadrınwotho da nathrawotho dkıtne bi morutho du İran.

I tarmithathe dıkmişaklo m’140 rmoyotho hathe mqabıl du İran, gıdmibayno mi sictho da buhone qutnuthoye dkımmathlo u kunoşo rabo dkulle da qoyume qutnuthoye bi kongre d’Amerika. Camgabıd du İranste gıdmibayın fusqone b’gawıd di tarmithathe mqabıl da rejime bcelıdboboye kulle dıbritho, baynothaye Rusya wu Sin.

Lfuth afusqone dkito bgawıd di tarmithathe, kmıntır dmitakılyo i mcadronutho Amerikoyto dııkmiqadmo lu athro d’Lebnon ula nathrawotho hrene du madınho mescoyo dkıtne bi morutho du İran. Be bzabno kmıntır dmitaqım u fsoso dıkmitahwe lhın athrawotho dhowelın esore momunoye camu İran xıd mathlo u Iraq.

Me gabo hreno, u bethdino du İran bu fusqono dmıdle hkımle bu icdam du qatlo d’Sayıd Mahmud Musawi dıkmıthım bi goşuşutho udmaqırle la nistixbarat Amerikoye d’CİA cali duktho dkıtwe u rişono d’Faylaq Alquds Qasem Sulaymani.

Lfuth u malolo du bethdino du İran, Almusawi kobewo mawdcınwotho u roze cala haylawotho İranoye qutnuthoye l’CİA ula Mosad İsarloye mqabıl d’zuze.