Amerika mhanela Lebnon cala guboye du parlamento dsimi bu zabnathe u li netiçathe d’xasır Hizballah wa noqufayde
Amerika mawdacla i thnihuthayda cala guboye du parlamento dsimi bu zabnathe b’Lebnon u dlawi şwole u qetre bu haqlo di mşaynutho bu athro. Bebzabno Amerika sımla qroyto la mşale Lebnonoyo dfulhi b’surhobo leşan dımşakli şultonutho u dmaxlısi du momuno du athrathe.
U malolo di wazirutho di baroyutho d’Amerika Ned Price huwle athmıl maqırhonutho cala guboye du parlamento d’Lebnon dsimiwo 15 bu yarhano. Price mawdacle d’Amerika fsiho la guboyani dsimi bu zabnathe, li netiçathe d’xasır Hizballah wa noqufayde a guboyani, u dlo nafıq ebeye qetre di mşaynutho.
Price mırle; Kımqadmina a tahınyothaydan lu camo cali mıştawtıfonuthathe la guboyani walaw a casqotho wa qetre dkito bu athro. Bebzabno kımawdena bi ulsoyutho du dawro dhawilın a hayle Lebnonoye wa hayle di mşaynutho gawoyto bu snodo du maşıqlano ubu duyoqathe di mşaynutho du camo.
Ned Price mırle’ste; Bu zabno d’Lebnon kıhayro laf qıddam, kısaymina qroyto la folitiqore kulle dımnaqın ula rişone folitiqoye d’şumci u talab du camo Lebnonoyo leşan u şuhlofo u dfulhi b’surhobo bnişo dmaşın fulhone lu texliso du momuno du athro. Ahna kıbcina dmişaklo cal xayifo i şultonutho-dmıdla u tuxlono du camo udu kenşo Emwothoyo kule.
Elo camathe’ste u malolo Amerikoyo grışle u zuhoro calu dawro dhawilın a noqufe d’Hizballah du İran bu jğuşyo dhawilın u dımnaselın d’zawni u qolo du camo wa rdufye dsımlın leşan dmitazıci a Lebnonoye. Mawdıc d’athmılste, maqbıl u plan du cedolo du momuno du athro-bıthır 3 eşne d’kriz rabo. U planano mtayıb ma wazire di şultonutho catıqto-meqım dımvayci u haylathe li şultonutho hathto dgımişaklo. U bank dbritho mfaşaqwole u kriz momunoyo d’Lebnon-ha ma krize qaşye dhawi me zabno d’150 eşne.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
