05/02/2021

Amerika u Fransa b’surhobo kıbci dmitagle cali netiçe da buqore du furqoco du lmino d’Beyrut

Amerika u Fransa sımlın qroyto dmitagle b’surhobo cali netiçe da buqore dsimi bi sbutho da celotho du furqoco du lmino d’Beyrut dıqtılwo ebe zıd me 200 farsufe.

Bebzabno, Amerika u Fransa bu buyono mşawtfo dfrıslın, makadlın dıklozım i kinutho dfayto la haye dlo mudaxala ma rişone folitiqoye.

Bi cohnutho dşafıc ışto yarhe calu furqoco du lmino d’Byarut, a’tre wazire di baroyutho dı Fransa ud’Amerika Jeaan Yv Le Drian u Antony Blinken bu buyono mşawtfo dıfrıslın, makadlın da tre athrawotho gdımdawmi u snodaththe u kulonoyo lu camo d’Lebnon u mırlın “xdu mede dsımwolan bu zabno du furqoco dhawiwo arbıco bu yarho d’Ob dşaficina, ucdo ste gdımdawmina dımqadmina mcadrınwotho msarhıbe lu camo d’Lebnon ba haqle du hulmono, du yulfono, da bote udu muklo. U acmayna ste kito Emwotho Mhaydotho, a’şorikaydan wu kenşo mdinoyo d’Lebnon dmıştawtafwolın la tre lumode du snodo du camo Lebnonoyo dımtaybiwo 09 bu yarho d’Ob dşaficina u 02 bu yarho d’Konun u qamoyo dşaficina”.

Camgabıdathe, a’tre wazire Le Driyan u Blinken mawdaclın dıkmıntır dlo mudaxala folitiqoyto dmitafito i kinutho la haye bi sbutho da buqore dsimi calu furqoco du lmino, uba melani mdawamlın “u duxrono d’falgıd di şato du gedşo mahişonano, kımakıd i sniqutho msarhabto dkıtlın a’Lebnonoye dfılhi b’şıkıl haroyo, bnişo dmafiti la haye a’şudoye dhuwolın dımşatsi şultonutho dkiba tuxlono laşan dfıtho u darbo b’qamuthıd da şuhlofe folitiqoye. A’tedbirani ulsoyene dmisomi laşan d’Fransa u Amerika wa şorikaththe dımadwmi u snodaththe l’Lebnon l’zabno yarixo”.

Mxasra hreto, i rişathızgado dı Fransa bu athro d’Lebnon An Ğıryo mawdacla dmede dlıkmitaqbılyo dhani ışto yarhe knıtri a’Lebnonoye dmitahwelın funoyo ma rişonaththe cali netiçe da buqore dcalu furqoco du lmino d’Bayrut. Ğıryo bu mamlo dsımla la Lebnonoye mırla “hawroni a’Lebnonoye m’zabno d’ışto yarhe u furqoco du lmino maqlabwole a’hayathxu mu rişo l’lalcıl, u mhewole Bayrut bu lebo. A’Franşoye lıgıdtocanxu u gıdfyaşi kalye acmayxu ucama rişone d’Lebnon kulle. Kıbcono naqla hreto dımmono elayxu di mşaluthathxu i farsufoyo wi mkanaşto asasyo. Hıwayu caşine dsaymitu u fulhono u Fransa gdımcadrılxu”.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…