Amerika u Ukraina mdelın qyomo momunoyo rwiho baynothaye bnişo dmisım u bnoyo u hethotho d’Ukraina dıshifo bi netiçe du qrobo

WASHINGTON/KIEV – U waziro di xazine d’Amerika Scott Pisent bi egartho dıfrısle bu darbo du vidio, mırle “fsihoyono dmawdacnolxu adyawma dımdelan qyomo di şawtofutho momunoyto makthabzabnoyto cam Ukraina”. 

Mxasra hreto, i wazirto du momuno d’Ukraina Yulia Sviridinko dımdela calu qyomano b’Waşington, mawdacla bi methcadronutho d’Amerika kfılhin ucdo dımşatsina sanduqo momunoyo awkith fond dgıdgorış camruhe tarmiyotho momunoye tibeloye lu athro d’Ukraina. 

Sviridinko bi maqırhonuthayda mawdacla ste du qyomano gıdsonıd tarmiyotho du tewfiqo d’macdane, nafto u ğaz b’Ukraina, u mırla ste “u qyomano bu formayda ducdo kımmathlo garanti du kuşoro da tre athrawotho Ukraina u Amerika.  

Bebzabno, Sviridinko makadla d’Ukraina gıdhowela morutho kamılto cala timoyothayda a’kyonoye, baynothaye a’macdane, u nafto wu ğaz dkıtne laltah di yarco, ucamgabıdathe i şultonutho d’Kiyev hiyayo dgıdımbayno ayko u mın şıkıl dı timoyotho u mluwe kyonoye gıdmitawfıq mi yarco. 

Meqım mıdmımde u qyomano, u rişono d’Amerika Donald Trump mırwole “Amerika kıbco mede mqabıl du tacbayda cam Ukraina. Mnaqelan a’macdane dkıtne bsire. U Ukraina kıtla macdane dkıtne ğalabe bsire”.