03/04/2021

Amşihoye mcayade u cedo di Qyamto d’Mşiho cama tedbire casye di Corona

Mcal fothe du virus d’Corona dımbarbız bı britho u dhawi celtho lu mawto dba mo alfayo dıbnaynoşo, mid adşatoste tedbire casye bu zabno da zawhe dıkmisomi bu cedo di Qyamto d’Mşiho bi mdito d’Urışlem.

Ba tedbire frişe dmidi, mbayın u mınyono da mhaymne dkibın dhudri ba slawotho uba zawhe dsimi. Işqadste bu cedano, simiwo a zawhani ma kohne u şamoşe dlo ma socure u mu camo mhaymno.

A citotho dıkmcaydi u yawmo di Sqifutho lfuth u surgodo d’Ğriğoriyos, jbiri b’dukotho dımcaydi u cedo bu darbo du nawlo. İ mdito d’Urışlem dıkmımloyo camo bi şabtho du Haşo ubu yawmo di Sqifutho, adşatoste mahıt thumo cali mıştawtıfonutho du camo mhaymno la slawotho mi celtho du virus di Corona.

Calathe a citotho mıdlın a tedbirathe mqabıl du virusano u snıdlın adşato ruhaye la alat du teknoloji, uba dafe du nawlo frıslın a zawhe wa Qurobe Alohoye, leşan u camo dmıştawtıf acmaye ba slawotho. Bıgawe da citotho’ste, hadiri belhude a kohne, a dayroye wa dayroyotho.

Ba koruzwothathe a kohne da citotho mırlın; Britho mhaydo bu haşano dı xlıqle u virus d’Corona. Xıd ğer athrawotho’ste, jbirina adşato dmaydina tedbire ban arcotho mqadşe udı sundina ruhayna la mkone du digital udu teknoloji leşan dmotina lu camo. İ cito di Qyamto, ftıhtoyo la socure elo u camo klozım dtore mesafa beynothe.

Me gabo hreno, hani zabno d’2000 eşne-lo qadıriwo a qrobe rabe u loste a gunhe, dmaklın u Vatikan dımtayıb a zawhani du cedo di Qyamto. Elo u virusano, trele du Papa Mor Fransis qadmoyo moyıd fusqono dımhadıd adşato a zawhani bu wahdo d’Mor Fetrus u Fawlus uba mikrofone dmahti, qadır u camo larwal dşomıc i slutho dsimi bıgawe di cito.

İ sictho celayto dıkfulho mqabıl du virus d’Corona du qlimo d’Kurdistan du Iraq, bu knuşyo dsımwola yawme d’Tlotho dşaficina, fsıqwola dsuxro a citotho, a masığde, a macıbde da Ezidoye wa dukotho hrene di slutho, mi celtho dıkmdawım u virus d’Corona dtofe beyn du camo. Gawonoyith a citotho b’britho kulle, mıde tedbire u manqaslın u mınoyo du camo dkibe dhodır ba zawhe tawdithoye du cedano. U camaydan dkıtyo cayıd di cito d’Juliyanus, gıdmcayıd u cedano 2 bu yarho d’İyor.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…