Amy Austin Holmes tlıbla me Woşington d’sundo u maşıqlo hatho dmabde beyn Turkiya wi PKK leşan a droşe du şlomo

İ mşawronitho catıqto di wazirutho di baroyutho d’Amerika Amy Austin Holmes mırla; İ qroyto du rişono Kurdoyo Öcalan lu gerillayde dtore mu zayno bıthır dore yarixe d’qrobo, gado ulsoyo u rabo’yo, dmitabdın a droşe hathe du maşıqlo du şlomo beyn d’Ankara wi PKK. Calathe Holmes sımla qroyto l’Amerika, d’sundo u maşıqlano u hatho leşan u şlomo bu Madınho Mescoyo.

Holmes meqım’ste sımwola Woşington sturyo calu qedomayda la krize d’Turkiya, Suriya, Cıraq u İran wu tathir mrimono dıktorın cala came etnikoye u tawdithoye xıda Ezidoye, a Suryoye Othuroye uğer. Camathe’ste Holmes maslela u qedomo d’Turkiya li sbutho du rişono zawgoyo catiqo d’HDP Demirtaş. Holmes m’akadla du inisyativano dmid bi sbuthathe-lfuth u xtuto d’Amerika’yo leşan u terkiwo di mşaynutho du qlimo kule, dım’athır mu qrobano dbeyn Turkiya wi PKK.

Bu tarano Holmes, snıdla i qroyto dsımwole meqım u malolo catiqo du koalisyon Emwothoyo Myles Caggins, dtlıbwole me Woşington dmaqimo i PKK mi lohithayda di marhıbonutho bnişo dmitabde maşıqlo da droşe du şlomo. Caggins mawdacwole’ste, di PKK hadırt’yo la droşe-elo naqla hreto mahto bi lohitho d’Amerika-bu zabno d’Hayıt Tahrir al Şam’yo-dıkmıhyo ba dukotho d’Amerika.

Me gabo hreno, folitiqore frişe di marcitho da Basque b’Spania u acmaye’ste qoyume du parlamento d’Swisra m’akade u snodathe lu mamlo dsımle Öcalan leşan u terkiwo du şlomo u mfaşaqe u mamlano makthabzabnoyo, u mkono hatho dmitabde naqla hreto maşıqlo d’droşe hathe lu terkiwo du şlomo beyn Ankara wa Kurdoye. Camathe’ste u mşawrono di mşaynutho du Cıraq, snıdle i qroytathe.

Qasım al Caraji sımle qroyto hem l’Turkiya u hemste lu gerilla di PKK dnufqi man arcotho du Cıraq u dımyaqri i moruthayde wu tlıble menaye, d’şumci li qroytathe du rişono Kurdoyo u dmabdın u maşıqlo da droşe du şlomo bnişo dmitarkıwo i mşaynutho du qlimo kule. Al Caraji mawdacle’ste d’Boğdod u gawonoyith u kenşo Emwothoyo me qariwo kımcaqbi a şuşotani bnişo du maşıqlano u folitiqoyo dhowe şuroyo hatho lu şlomo bu Madınho Mescoyo.