Ankara gzımla Tel Aviv dlo huçmo cal Hamas bıgawe d’Turkiya

Bu zabno du qrobano dbeyn İsroyel u Hamas kımdawım hani 8 şabe cal hıdode, grışlın a mşale Turkoye u zuhoro d’Tel Aviv dlobo aftho la istixbaratayda d’Mossad, dsaymi cuqobe cala noqufe u hadome du tukoso marhıbono d’Hamas dkıtne b’Turkiya.

Ankara kımmo; En dothe dmisım hawxa hçome ban arcotho d’Turkiya, tro İsroyel dhuwyo hadırto dgımitahwela funoyo. Meqım kmo yawme, a istixbarat d’İsroyel-Mossad mawdacwolın, d’athilın amro mi şultonutho, dımtaybi plan du qatlo da noqufe d’Hamas hayko dhowın b’britho u dilonoyith a rişone du tukoso marhıbono dkıtne b’Turkiya, b’Lebnon ubı Qatar.

Lfuth u ajans da tebe d’Turkiya, a mşale Turkoye lo trelın bu dacbar d’hayle nuxroye dsaymi cuqobe bıgawe da thumayda wu ucdo’ste, lıkobın aftho l’İsroyel dsaymo hçome bıgawe d’Turkiya. Mawdıc du MİT d’Turkiya mawdacle i klaytathe bi sbuthathe la istixbarat d’İsroyel.

Ankara lo kubco dmahrıwo a esorayda cam İsroyel elo bebzabno, idicoyo’ste

d’Turkiya kısundo u tukoso marhıbono d’Hamas wu rişqutno Erdoğan hawile ytawyotho acme u kımfaşaqle, xıd tukoso du texliso da Fleştoye ulo xıd tukoso marhıbono lfuth i hzayto du macırbo.