Anoqazyotho Turkoye bu Iraq u menyonathe mati la 40

İşultonutho du Iraq mzaharla Turkiya ma hjome dıksaymolın, u mawdacla dkıtla u zedqo dsaymo u sutoro da narcothayda.

Camgabıdathe, mabuce Iraqoye di mşaynutho mawdaclın da nuqazyotho folhoye dımşatsila Turkiya ba narcotho du Iraq mati u menyonaththe l’40 nuqazyotho.

İ wazirutho di baroyutho du Iraq, krıhla ahjome folhoye dıksaymolın Turkiya calu garbiyo du athro. Bu buyono dıfrısla i wazirutho makadla dıklozım Turkiya dmakılyo ahjomayda u dgırşo ahaylawothayda ma narcotho du Iraq.

Bebzabno, i şultonutho d’Boğdod mzaharla Turkiya u mawdacla dkıtla u zedqo dsaymo u sutoro da narcothayda. Bi maqırhonutho dhule u malolo di şultonutho du Iraq Ahmad Talal, mawdacle da hjome Turkoye kmamtın husrono li mşaynutho qlimoyto, ukımmathli dyoşo li morutho athronoyto du Iraq u qento la bnaymothoye ula mulkonathe.

Camgabıdathe, u menyono da nuqazyotho folhoye Turkoye bu Iraq zayıd tloth naqlat calu menyono dkıtwolın meqım tarte ışne. Mabuco di mşaynutho mu garbiyo du Iraq bi maqırhonutho dhule li sferyawmo d’Almada, mawdacle da nuqazyotho Turkoye zayidi bıthır ma hjome haroye dsimi calu garbiyo du Iraq, wu menyonathe mati l’40 nuqazyotho, baynothaye b’gawıd da narcotho du Iraqne, wa hrene calu xtuto du thumone.

Meqım mathe, u rişwazire catiqo dı Turkiya Binali Yıldırım bu knuşyo dsımwole lu tboco froso bı Boğdod i şato da 2018, mawdacwole dı Turkiya kıtla 11 nuqazyotho folhoye bu Iraq.

Bu yarho dşaficina, mşalo Turkoyo mawdacwole lu tboco froso du macırbo, d’Anqara kıbco dımşatso nuqazyotho zabnoye hathe bu garbiyo du Iraq, bi dacwa dlımisım hjome ma mharbone di PKK ma narcotho hathe dmahıt ido aclaye bu garbiyo du Iraq.

Bi netije da hjome Turkoye dıkmisomi calu garbiyo du Iraq, u camaydanste dıkhoye b’Zaxo, b’Nuhadra ub’Haftanin kloqın husrono rabo. Athmıl sim hjomo cal tloth qıryawotho du camaydan b’Zaxo, u hulın husrono rabo la narcotho u mulkonaththe, u jbırlın u camaydan dımgalwın ma qıryawothayde.