Arbco gabe Swedoye mhaydi bu renyo mşawtıfo cali sbutho di siyase di galwoyutho

Arbco gabe Swedoye, mhaydi bu renyo mşawtıfo dımqadamlın bi sbutho di siyase di galwoyutho. Elo walaw mte lawyutho, u gabo tuhmonoyo d’SD wu gabo da Liberaloye naqla hreto latwın bcayni renyo bi sbutho da galwoye.

Bi orucutho dımtaybo bu froshezwo du Swed beyn da gabe frişe du athro, mahweste hfuxyo mqabıl du mamlo du rişono d’SD dımdacele, dkito asirutho beyn du cnufyo dıkmisım cala neşe u da galwoye dkıtne bu Swed.

Kımo şoce meqım mi tahrazto di orucutho dsimo bu froshezwo du Swed, mşahlıfo i awyutho dhawyo beyn du gabo da Liberaloye u du gabo yaminoyo tuhmonoyo d’Sverge demokraterna. Meqım mathe 4 gabe Swedoye matınwo lawyutho cal renyo bi sbutho di siyase dcala galwoye.

A gabani’ste-u gabo du Mahduro, d’Centern, Sverige demokraterna uda Mşihoye demoqratoye’ne. Elo a rişone da Liberaloye wa tuhmonoye du Swed hawilın renye frişe bu şwolano u rişono da tuhmonoye thımle a Liberaloye, dıkmankıri u şwolo dıkxulqli a galwoye bu qetro di mlahmonutho-du integrasyon.

Elo a Liberaloye m’akade dhınne gıdmdawmi dımdafci u zedqo di galwoyutho. Sbutho hreto d’drişo u şwolo du qatlo udu cnufyo dıkzoyıd mqabıl da neşe bu Swed’yo wi rişonitho du gabo d’Centern mawdacla u hfuxyayda lu mamlo dsımle u rişono du gabo tuhmonoyo Jimmi Åkesson dmawdacle, dkito şıkıl d’esore beyn du cnufyo dıkmisım cala neşe uda galwoye-awkith sımlan import u şıkıl du qedomo dkito la neşe

Annie Lööf mırla; Kıruğşono ruğzo mqabıl du mamlano. Hani ba casrowat d’eşne maşe rdufye qaşye mqabıl da neşe, mafiti b’teşniqe u qtili ba botathe. Lo torıt du droşano’ste dhowe cala galwoye wu lfuth u mede dıkmahwe, samıt bi sbuthathe da galwoye. U qetrano da neşe ğalabe jıddi’yo u klozım dmıdrış towo, cal di sbuthathe-şwolo du nomuso esonoyo’yo wu ucdo kmidış u qonunano.