A’rişone da Druz dıkhoyın bi fnitho d’Jaramana bı Darımsuq, rfıdlın dmasılmi u zaynaththe li şultonutho du maşıqlo folitiqoyo hatho d’Suriya

SURIYA – A’Druz dıkhoyın bi mditho d’Sweda ubi qastra d’Jaramana bı Darımsuq, kımdawmi drıfdi u teslimo du zaynaththe li şultonutho hathto d’Suriya, uknıtri dhowe u hezwo folitiqoyo qriho, udmisım u garanti dmitahwelın a’came d’Suriya kulle a’zedqaththe. 

U şex da Druz di qastra d’Jaramana Mansur Alatraş, bi maqırhonutho dhule lu tboco froso mırle ”inaqla dhowe şultonutho tawto b’Suriya yacni layto sniqutho lu tcono du zayno. Layto noşo dkobıc dıtocın zayno, lo xıd camo uloste xıd rişone. In dothe dqathlan garanti dlımidoşi a’zedqaydan xdu mede dhawi b’fenyotho hrene b’Suriya, inaqlayo gıdhowina hadire dmasılmina u zaynaydan. A’bnaynoşo latne fsihoye bu zayno”. 

I qastra d’Jaramana dıkrıhqo 7 kilomıtre mu qentrun di mditho dı Darımsuq, latyo masırto cami şultonutho hathto d’Suriya mi xasra di mşaynutho, elo kmisım u duyoqayda mi qelayto da cuqobe d’Jaramana dkıtyo masırto cama rişone da Druz d’Sweda. 

B’Jaramana khoye hedor tre malyune u 500 alfo farsufe, i sagiyuthaththe Druz ne. Bi fnithathe qtılwo u mçarahwo menyono d’farsufe ba taxtuşe dhawınwo bayn di qelayto da cuqobe d’Jaramana wa haylawotho di mşaynutho gawonoyto di şultonutho zabnoyto d’Suriya. 

Bıthır ma taxtuşani dhawınwo, i şultonutho d’İsroyel mşadarwola zuhoro li şultonutho dı Darımsuq bu darbo du wazirayda di baroyutho, u tlıbwola dmiyaqri a’zedqe da came kulle d’Suriya dilonoyith da Druz. Isroyel makadwola ste dıklozım dlımitıstacmıl u zayno mqabıl da Druz d’Suriya.