Armenia thımla Azerbaijan bu hjomo qaşyo dsımla cali mditho d’Stepanakert

 İ arişkoyto du qlimo d’Nagorno Qarabax, mido nişo lı cuqobe qaşye. Armenia thımla u gayso d’Azerbaijan, bu hjomo qaşyo dsim cali mditho rabtho du qlimano Stepanakert. Bu hjomano dsim, mawdıc dhiw husrono rabo la bınyone di mditho.

 İ wazirutho du sutoro d’Qarabax makadla uhjomano u mawdacla, dhol 151 ma folhayda qtili mu zabno dımşarelın a taxtuşani cam Azerbaijan. Bebzabno u malolo di wazirutho du sutoro d’Armenia mawdacle, dıqtilın bu zabno da 24 şoce haroyani, hol 540 folhe d’Azerbaijan.

 Hani 6 yowme kımdawmi a taxtuşe beyn Armenia u Azerbaijan, u athmılste thımla Armenia u gayso d’Azerbaijan, bu hjomo qaşyo dsim cali mditho rabtho du qlimano d’Nagorno Qarabax Stepanakert. Bu hjomano qtil mdinoye u 4 hrene mjarhi wa bınyone di mditho hzelın husrono rabo ma hjomani wu camo jbir dhoyır li mşaynuthayde.

Mu zabno dımşarelın a taxtuşaniste, mawdıc dıqtil 200 farsufe; beynothaye 30 mdinoye b’Qarabax. İ Mşatasto da Zedqe Noşoye d’Suriyaste mawdacla, d’28 marhıbone d’Suriya dınqili me Turkiya l’Azerbaijan, qtili ba taxtuşani u bu şıkılano mati u mınyono da marhıbonani dıqtili l’850 farsufe. U mşawrono du rişqutno d’Azerbaijanste mawdacle, dmafır hol 2 alfo soruhe b’Terter u mırle; Hano hawbo du qroboyo.

Bebzabno u malolo di wazirutho du sutoro d’Armenia mawdacle, dıqtilın bu zabno da 24 şoce haroyani hol 540 folhe d’Azerbaijan. Armenia makadlaste, da hayle d’Azerbaijan kmıstacmıli zayne yaqure u hatta foqucotho da suğle dkıtne zayne mnice bı britho. Camatheste mıhe bıha baso nacimo b’Qarabax dkıtwo bıgawe 10 gelyunore Armınoye u Emwothoye elo bu hjomano noşo lo qtil.

Armenia u Azerbaijan kımdawmi dtıhmi hıdode ba hawbe dıkmisomi elo Yerevan makadla, da cuqobani dıksoyım u gayso d’Azerbaijan cal Qarabax kmisomi bu kordinasyon da hayle dilonoye d’Turkiya wi mudaxalathe d’Ankara lu qrobano, dyoşo kamilo da qonune Emwothoyeyo. Turkiyaste kımdawmo dımşadro tayosyotho di goşuşutho lu qlimano, leşan dımcaqbo u zawco da hayle d’Armenia u dı Qarabax.