Armenia u Azerbaijan mşahlaflın yasire du qrobo

Armenia u Azerbaijan, mşahlaflın yasire du qrobo. 12 folhe yasire d’Azerbaijan, nqili b’tayosto Rusoyto l’Baku, wu 44 Armınoye yasire manhıti bi arişkoyto d’Armenia Yerevan.

 Bebzabno, a yaqrotho da folhe dımvayci ba taxtuşe dhawın’wo b’Qarabax, kıtulbi funoyo mi rişonutho d’Armenia.

U rabhaylawotho da hayle Rusoye b’Nagorno Qarabax-Rustan Muradov huwle mawdconutho calu şuhlofo da yasire, dsim athmıl beyn Armenia u Azerbaijan bi mescoyutho da hayle Rusoye. 12 folhe d’Azerbaijan dımsikiwo ma hayle Armınoye bu zabno du qrobo b’Qarabax, marwıxi b’tayosto Rusoyto b’Armenia u nqili l’Azerbaijan.

Bebzabno 44 folhe Armınoye dkıtwın bide da hayle d’Azerbaijan, nqili b’tayosto Rusoyto li foqudutho du gayso Armınoyo bi arişkoyto Yerevan. U şuhlofo da yasire, ha ma şartat dmahıtwola Mosko bu qyomo dımdewo beyn da mşale d’Armenia, Azerbaijan. Muradov m’akadleste, da fulhonathe gıdmdawmi leşan dmitabıq u qyomano kamiloyith.

Elo camu şuhlofano da yasire, kito’ste mınyono celoyo d’folhe Armınoye dheş noşo latle xabro menaye. A yaqrotho da folhani hani 2 şabe cal hıdode kısaymi tagliyotho du protesto u kıtulbi dmitahwelın mawdconutho cali ctidutho da folhathe. A folhe dımvayci’ste, i sagiyoyuthathe mi foqudutho d’Vağarşapat b’Qarabax’ne.

Me gabo hreno, u Qatholiqos du bayto rabo d’Kilikya fatıryarxo Aram I’yo, sımle qroyto lu camo d’Armenya dımcadri a nacime du qlimo d’Nagorno Qarabax, u mırle; Bu taro da şartat momunoye casqe du virus d’Corona, britho kula kımtaybo ruha dmıstaqıblo i şato hathto. U qrobo wu qento di Corona kımathli haşo rabo lan Armınoye u dilonoyith calu camo d’Qarabax. Ktulbina mu camo dmarhıq ma hfitwotho cyodoye du cedo du mawlodo udi Rişe d’Şato, u dımbayın masraf da cede uda duşne la nacime du qlimo d’Qarabax.