Armenia u Azerbaijan thıme hıdode bu tehriwo di şalyuthzayno

Bıthır mıd i şalyuthzayno fayito athmıl la haye beyn Armenia u Azerbaijan calu qlimo d’Nagorno Qarabax, adyawma fris tebe dı dişo i şalyuthzaynathe.

 Armenia u Azerbaijan ktuhmi hıdode, dı dışlın i şalyuthzayno dsimo bi mescoyutho d’Rusya. Ubu zabno d’athrawotho frişe kımhanın u terkiwo di şalyuthzaynathe, Turkiya kımdawmo naqla hreto ba provokasyonayda.

Bi şalyuthzayno zabnoyto dfayito athmıl la haye beyn da hayle d’Armenia u d’Azerbaijan calu qlimo d’Nagorno Qarabax bıthır 2 şabe d’taxtuşe qaşye, a 2 athrawotho thımlın hıdode, dı dışlın i şalyuthzaynathe dsimo bi mescoyutho d’Rusya. Bi şoctho da 12 d’falge d’yawmo mşarewola i şalyuthzayno wu alarm da foqucotho şaliwo.

Elo bıthır kimo qatinotho, mawdacla i malılto di wazirutho du sutoro d’Armenia-Şuşan Stepanjan, d’Azerbaijan mhela b’Karşanbejli u bu şıkılano, dişo i şalyuthzayno. Bu mhoyanoste, mawdıc diqtil 2 mdinoye. İ malılto mawdaclaste d’Qarabax, kımhadro ruha dımfanyo uhjomano dsim aclaye. Bıthır falge d’şoctho i wazirutho du sutoro d’Azerbaijan baroyo thımla Armenia, dı dışla i şalyuthzayno bıthır mıd mihe bu zayno b’Terter u Agdam u dıqtil mdinoyo.

A hjomaniste xlıqlın otho dı şwolo mıqa gdımdawmo i şalyuthzaynathe dbeyn da 2 athrawotho. Cala mhoyani dhawın, u waziro di baroyutho d’Rusya Sergej Lavrov hawile mamlo bu telefon cama 2 bnayamne d’Armenia u Azerbaijan u tlıble menaye dfayşi masre bu ittifaq dhawi beynothaye.

Me gabo hreno, bu zabno d’rişone d’athrawotho frişe; beynothaye Fransa, Yawnan, İran, Georgia, Austoria, Almanya mhanelın i şalyuthzaynathe dhawyo beyn Armenia u Azerbaijan, i şultonutho d’Ankara dıksundo Azerbaijan abico naqla hreto d’juğro i nuro beyn da 2 athrawotho şbobe.

Bu mamlo dsımle athmıl u waziro di baroyutho d’Turkiya Mevlüt Çavuşoğlu mırle; Bu qrobano dımşarewole 27 bu yarho d’İlül, mahwela Azerbaijan l’Yerevan u lı britho kula, dıkqudro dımharıro a dukotho dıkbişi me Armenia. Azerbaijan huwla u gado haroyo l’Armenia, dmıgroşo me Qarabax.