Armenya u Azerbaijan ktıhmi hıdode bu tworo di şalyuthzayno

Armenya u Azerbaijan adyawma naqla hreto thımlın hıdode bu tworo di şalyuthzayno bu qlimo d’Nagorno Qarabax.

 U waziro di baroyutho d’Armenya Zohrab Natsakanyan bi ytawto dhawile camu baramnayde d’Rusya, thımle i şultonutho d’Azerbejan dlıkımyaqro u qyomo di şalyuthzayno, uksaymo hjome cal şutose u cal şawthawotho mdinoye bu qlimo d’Qarabax.

İ malılto di wazirutho du sutoro d’Armenya, bi maqırhonutho dhula adyawma lu tboco froso, mawdacla da haylawotho d’Azerbaijan ba hjome dsımla adyawma safrayto ba soruhe u ba topat mxasawır mşahılfe, naqla hreto twırla i şalyuthzayno bu qlimo d’Nagorno Qarabax. Ubebzabno, i wazirutho du sutoro d’Azerbaijan mawdacla da haylawotho d’Armenya mabdelın adyawma safrayto hjomo cali fnitho dı Tartar, wu medano rfıdla Yerivan, u makadla dhiya kımyaqro i şalyuthzayno, elo knufqo mqabıl da hjome dıksaymolın Bako.

Camgabıdathe, Azerbaijan dıqtil 41 mdinoye u mjarıh zıd me 200 hrene bu qlimo d’Qarabax, elo lımaglela cala husronayda bu haqlo folhoyo. Adyawmaste hın ma mşale Armınoye dkıtne b’Qarabax bi maqırhonutho dhulın lu ajans Rusoyo d’İnterfax, mawdaclın dıqtil 17 folhe Armınoye hrene bu qrobo mqabıl Azerbejan, u bu şıklano u menyono da folhe du gayso d’Armenya dıqtili bu qrobo dımşarewole 27 bu yarho d’İlıl dşaficina mati l’542, baynothaye kito menyono d’sohde mu camaydan u Othuroyo dıkhoye ba qıryawothayde b’Armenya.

Mxasra hreto, u waziro di baroyutho d’Armenya Zohrab Natsakanyan thımle i şultonutho d’Azerbaijan dıksaymo hjome cala şutose ulsoye ruşmoye u cala şawthawotho mdinoye bu qlimo d’Qarabax, u mawdacle d’Bako lıkımyaqro u qyomo di şalyuthzayno. Natsakanyan bu knuşyo dsim athmıl lu tboco froso bı Mosko camu baramnayde Sergey Lavrov, mawdacleste da fulhone dıksaymolın Turkiya bi sbutho du nqolo d’marıhbone me Suriya u me Libya laşan dımcadri ahaylawotho d’Azerbaijan, gıdmarwıhi i ruqco di marıhbonutho u gıdımharhızi i aykanoyutho bu garbiyo du Qafqaz.

Mxasra hreto, u rabo da mşawrone du rişwazire d’Armenya Fağarşak Harotyonyan bi maqırhonutho dhule lu ajans Rusoyo dı Tas, mawdacle dıkmitahıt terpılyotho qum di wolitho di mescoyutho dıksaymola Mosko, bi netije du hboso baroyo dıkmisım me Turkiya cali şultonutho d’Azerbaijan. Harotyonyan mawdacleste dı Turkiya bu hboso dıksaymole cal Bako, kıbco dmaydo dawro rabtır bu şroyo du kriz du qlimo d’Nagorno Qarabax.

Camgabıdathe, i mqadmonitho dı tahrazto bu froshezwo Amerikoyo dkıtyo bebzabno foto model Kim Qardişyan, mqadamla malyun dolare mcadronutho lu fond da n’Armınoye d’Qarabax.

Bu zabno du qrobano dkımadwım b’Qarabax, Turkiya sxırla qum da bnaymothoyayda a’dafe Armınoye du nawlo dkobın tebe u mawdcınwotho cala şuşote du qrobo d’Qarabax.