Athar catiqo mu zabno di mamlaxtho dan Othuroye dkıtyo 3 alfo eşne, gıdmıfrıs bi bethcatiqotho Athronoyto du Swed

STOCKHOLM – U froshezwo ruşmoyo du Swed maglele, di bethcatiqotho Athronoyto dkıtyo b’Stockholm gıdfırso cal qariwo falqo d’athar makthabzabnoyo d’3 alfo eşne. U atharano dkıtyo mu zabno di mamlaxtho dan Othuroye, hawile hani ba casrowat d’eşne bu cambarano di bethcatiqotho.

İ mdabronuthayda kıtwola zuctho du athar dhoze husrono en dmıfrıs lu camo, u calathe trewola talyo bu cambarayda. Bıthır mu talab dımqadım, fsıqla i bethcatiqotho dfırso u atharano d’qayıthle qeloyto ruhe bi bethcatiqotho.

Bu dumyano, 22 bu yarhano’ste gıdmitayıb yawmo dilonoyo u ruşmoyo bi bethcatiqotho Athronoyto camu riksförbund dan Othuroye bu Swed, leşan dmitahwe u atharano lu camo. Bi hfituthathe’ste gıdmitahwıyo i mardutho du camaydan-bi musiqi, ba raqde marduthoye uba muklonayde.

U atharano, meqım bu şuro du qusro dkıtwe bi mdito d’Kalah-awkith Nemrud. Mawdıc du atharano hıwo duşno mi malıktho du Swed Josefina bi şato 1866 bu zabno dsımwo u futoho du bınyono di bethcatiqotho. Ba qrobe dhawın bu Cıraq, sagiyoyutho ma atharayde a makthabzabnoye ya mahrıwi u yaste gniwi u mzabni bu pazar komo.