Athi sturye mşahlıfe lu qedomo d’Turkiya bi sbutho du Yamo Mescoyo

Almanya mawdacla dı Turkiya klozım dmakılyo ahırhoşayda bi sbutho da fulhone du kroxo dcalu ğaz bu madınho du yamo Mescoyo.

 Camgabıdathe, u Huyodo d’Urifi mawdacle dıgdorış i şabthathe u qedomo dı Turkiya dıkmaqşe u kriz du madınho du yamo Mescoyo.

 U waziro di baroyutho d’Almanya Hayko Mas adyawma meqım mi socurutho dmabdiyole l’Qufrus u lu Yawnan, bi maqırhonutho dhule l’Reutrs mawdacle dıklozım Turkiya dımbatlo u şıkıl du qedomayda dkibe ğalabe naqlat hurhoşo mqabıl du Yawnan u Qufrus, u mırle “Turkiya ida dıkmahwiyo yasifutho la droşe klozım dmakılyo afulhone du hurhoşo dıksaymolın bu madınho du yamo Mescoyo. Turkiya klozım dhowela methfathonutho cala ytawyotho da droşe”. U waziro Mas dsımle qroyto l’Anqara dmakılyo afulhone du kroxo dcalu ğaz, mawdacleste d’Almanya kmahwiyo awyutho cam Qufrus u camu Yawnan xıd tıre athrawotho şorike bu Huyodo d’Urifi.

Camgabıdathe, u malolo di şultonutho du Yawnan Stilyos Bitsas mawdacle dı Turkiya ba fulhonayda mıthabatla dlatla şafyutho u şarirutho, u mawxa klozım dmibayın şroye qşeytır lu kriz du madınho du yamo Mescoyo. Bebzabno, i wazirutho di baroyutho du Yawnan, mawdacla du şedoro di sfitho harayto dı Turkiya la maye qlimoye du Yawnan, kımathıl tehdid baroyo lu şlomo di fnitho.

Megabo hreno, i wazirutho di baroyutho dı Fransa mawdacla dıklozım Turkiya dnıfqo moro la şudoyayda, u dmakılyo afulhonayda du hurhoşo.

U waziro di baroyutho du Huyodo d’Urifi Josep Boril bi maqırhonutho dhule, mawdacle du Huyodo gıdorış i şabthathe u qedomo dı Turkiya, u mırle “Turkiya mdarbıd dımcadro bu tenqiso di mwatyutho, kmaqşiyo akrize zıttır, u ahna kmıtyaqnina dı Turkiya sniqoytoyo dmıştawtıfo lu qefoyo dışroye mdarbıd du qedomayda u mrimono”.

U mdabrono du qentrun du madınho mescoyo da taşrore u da buhone Seth Frantsman, mawdacle dı Turkiya mıstacmela sfinotho du duyoqo, laşan dmacjızo u Yawnan u dxılqo krize bi fnitho. Frantsman mawdacleste dı nişo Turkiya dmaqwiyo i propaganda di mothonoyutho sa bnaymothoyaydayo, u dlımıgrış u zuhoro cali Lira Turkoyto dkul dkothe kmıshofo.

Camgabıdathe, u yadıcthono bi bethsawbo d’Mimoryal b’Kanada Ev Kaman mırle “Turkiya kımdawmo dmarwıho ruha bu madınho du yamo Mescoyo, u lıkmahwiyo ulsoyutho lu qonuno emwothoyo, u lıkımyaqroste i morutho du Yawnan”.