Aykanoyutho harayto Iran

TAHRAN – U rejim du İran mşarele bu qatlo dkul man dıkrofıd ma haylawothayde dmıstacmıl u cnufyo udmarıs buğre cala mtagılyone. İ dafo d’İran İnternational maglela liholo dha ma hadone da noture qawmonoye dışme Qasem Fath Allahi, qtil yawme dı Tltoho dşaficina cal idothıd da haylawotho da noture qawmonoye du İran.

Lfuth i mawdconutho dıfriso, Qasem Fath Allahi qtil qum du baytayde b’tlotho buğre dmarıs acle m’ha farsufo dıkqolacwo motor. İran İnternational mathkarla ste du şutoso da n’istixbarat da noture qawmonoye, hani zabno dıkmo şabe mıdwole Qasem Fath Allahi lu duyoqayde, cal dhawiwole şubha dlıkmarıs buğre cala mtagılyone, udlıkmıstacmıl u cnufyo mqabıl dıththe. An’istixbarat İranoye bıthır ma buqore dsımlın, mahwele d’Fath Allahi latwe balhude, elo masrowe cam falqo ma haylawotho di mşaynutho dlıkmatici a’noture qawmonoye awkith dlıkmarisi buğre cala mtagılyone.

U qatlo d’Qasem Fath Allahi kıgorış u zuhoro cali fliğutho dkiba dhuyo bayn da noture qawmonoye du İran, bi netiçe da qetre dkito bayn da grubaththe bi sbutho du qedomo lafa tagılyotho du protesto.

Camgabıdathe, u bethdino du İran hkımle bu icdam calu mtagılyono mciqo Mansur Dahmarde dmahıt bu hbuşyo, cal dmıştawtafwole la tagılyotho di mditho d’Zahidan bi hiğmonutho d’Balluşıstan. Dahmarde dımsıkwo meqım zıd m’tlotho yarhe, kmıthım mu bethdino du qawmo bi dacwa dıkforıs u fasad bi yarco. Dahmarde bu ytawto du bethdinayde, mawdacle dbalhude tlotho kefe mhalaqle u mawqadle dulabo dıhdo radayto, elo u dayono mırlele “kul farsufo dıknofıq mqabıl du rejim d’Xaminyi, gıdmıhkım acle bu icdam du qatlo”.

Lfuth i dafo d’(H)al Waş da tebe d’Balluşıstan, Mansur Dahmarde twiri carşone u nhire bi netiçe da temşiqe qaşye dsimi acle b’gawıd du hbuşyo di wazirutho da n’istixbarat bi mditho d’Zahidan.