Ba guboye dsim b’İsroyel naqahreto Natanyahu nafıq qamoyo

U athro d’İsroyel bzabno karyo, hani 3 naqlat sımle guboye gawonoye, metul da gabe du athro lo qadiri dımşatsi şultonutho.

 Ba guboye dhawın athmıl lfuth u kunoşo dheş latyo ruşmoyo, u gabo d’Likud du rişwazire Benyament Netanyahu nafıq u qamoyo.

U parlamento d’İsroyel dkıtla 120 kursawotho fliğe cala gabe du athro dkıtne gabe mşahılfe baynothaye kito atre gabe dkıtne bi sagiyutho ha mane u gabo d’Likud dkıtyo bi rişonutho du rişwazire  Benyamen Natanyahu, wu gabo hreno dıgmitawmarle u gabo du itifaq zarqo heworo dkıtyo bi rişonutho Benny Gants.

Lfuth a kunoşe dı latne ruşmoye da ğuboye d’İsroyel  u gabo d’Likud d’Natanyahu mıdle 37 kursawotho mu parlamento du athro u hawi u gabo qamoyo, bıthır me LİKUD u gabo du İtifaq du zarqo u heworo mıdle 32 kursawotho.

Lfuth u mınyonano heş u gabo d’Likud laybe mşatıs şıltonutho lruhe elo kıtle sniqutho lhın ma gabe hrene dkıtne bu parlemento du athro.

Bu şıkılano Natanyahu du gabeyde nafiqi qamore ma ğuboye sniqoyoyo dsoyım itifaq camma gabe hrene, elo u gabo dkıtyo datre du itifaq zarqo u heworo mawdacwole dlıkobıc dsoyım şıltonutho camu gabo d’Likud.

U mede dıgorış u zuhoro u rişono du gabo d’LİKUD Natanyahu inaqa dıcabır la ğuboyani kıtwole 3 bethdine bı qdole dı methamwo bu fasad u mu muklo da zuze, elo naqa hreto huve nafıq u qamoyo da ğuboye, kmahwe u ftoho da bethdinani hawın li maslaha du gabo.