Ba marcıyotho d’Missouri u Kentucky b’Amerika, hzelın husrone rabe bıthır ma calcole qaşye dhawın hani kmo yawme

KENTUCKY, Amerika – Hani kmo yawme, d’duktho frişe du taymno d’Amerika m’athri yaquro ma gunhe du kyono u lfuth i sfaryawmo d’New York Times, mvayaclın 25 farsufe a hayathe bu zabno da tornados-da calcole şafici a marcıyotho d’Missouri u Kentucky, gıdmdawmi’ste li marcitho d’İllinois. Bğer dafe’ste kmitawdıc, dhol 27 farsufe mvayaclın a hayathe u kito ba casrowat dıbnaynoşo mçarhe ba bethkrihe.

Ba marcıyothani’ste, sim iclan aykanoyutho şnızto wa mdabronwotho mawdaclın, dkito gado rabo du mınyono da mithe uda mçarhe dımdawım dcole. Bi hawa qwitho da calcolani-du xurtom, hayidi a bınyone, shifi hol 5 alfo bote, maklın a fyore da tayosyotho uhol 600 alfo bnaynoşo’ste fayış dlo kahrobo.

Cama husronani’ste, a qablowiye wa şafude du kahrobo nafili u qtic u kahrobo cal 600 alfo dıbnaynoşo. Ba calcole dhawın’wo meqım 2 yarhe’ste, mvayacwolın 24 farsufe a hayathe. A calcolani, kull şato kımkalfi a haye dba casrowat dfarsufe dıkhoyın ba marcıyotho dıkşufci ba thume du xtuto dıkmitamırle-Tornado Alley b’Amerika.