Ba n’alfowat d’mtagılyone İsarloye layimi athmıl qum du bayto d’Netenyahu, xıd protesto mqabıl du tedbiyo du qrobo m’hatho bu qlimo d’Ğaza

URISLEM – Athmıl casriye, ba n’alfowat d’İsarloye methkanaşlın qum du bayto du rişwazire Bınyamen Netenyaho bi mditho d’Urışlem, u mahwelın u hfuxyaththe mqabıl du mahwo şqolo dhawile Netenyaho bi sbutho du kriz da yasire İsarloye, u mqabıl du fusqono di şultonuthayde dmaqımla u rişono du şutoso di mşaynutho gawoyto d’Alşabak Ronin Bar mi wolithayde. 

I taglithathe athyo luhwoyo laltah du matro hiso, bu zabno dlayımwo u mawtbo da wazire d’Netenyaho laşan dsoyım quwolo cali sbutho du teqimo du rişono d’Alşabak Ronin Bar mi wolithayde. U teqimo d’Bar mi wolithayde kmıhze m’ğalabe İsarloye xıd dawse dıkmaciqo a’dangat da hayle b’gawıd d’İsroyel. 

Bi taglithathe nafıq liholo taxtuşe bayn da powelıs İsarloye wa mtagılyone dımnaselın dşıfci a’satre dmahtiwo b’qamuthayde, elo a’powelıs marıslın maye cjiqe cala mtagılyone laşan dmibarbızi miholo, u mhelın lhın menaye u msıklın ste hrene. 

Mixal Halbrin dkıtwa hdo ma mtagılyone, bi maqırhonutho dhula lu tboco froso mırla “mdarbıd dmitaqım u rişono da Şabak mi wolithayde laşan dlımmisım buqore cam Netenyaho, kmıtyaqnono du rişwazire klozım dhowe şğişoyo bi sbutho du texliso da yasire dıtrın bu qlimo d’Ğaza laşan dloqın u mawto”. 

Mxasra hreto, u rişqutno d’İsroyel İshaq Hartsuğ mahwele ilothnihuthayde ma dawsat dımhalqila i şultonutho d’Netenyaho bi sbutho du hçomo cal Ğaza u mırle “mede dlıkmitaqbıl yo u qrobo dmabde m’hatho bu zabno dkımdawmina dsaymina i wolithaydan i mqadaşto du tedciro da yasire la botaththe”.