Bayn 50 uhul 60% mu camaydan u Suryoyo dacır li qastra d’Bağdede di daşto d’Ninwe

Bayn 50 u hul 60% mu camaydan u Suryoyo dacır li qastra d’Bağdede di daşto d’Ninwe mu zabno dsımwo u hurorayda m’Dacış bi şato da 2016 uhul ucdo.

Cala tahrazyotho du bnoyo u hethotho d’Bağdede, i qaymaqamiye mawdacla dmasrıf hul ucdo 6 milyare dinore Iraqoye.

U qaymaqam di qastra Suryoyto d’Bağdede di daşto d’Ninwe ardixlo Cisam Bahnam Matti, bi maqırhonutho dhule athmıl lu froshezwo d’Alcahıd Aljadid maglele cali kmoyutho du camaydan uda came hrene dıdaciri la botaththe bi mditho d’Bağdede uba qıryawotho d’hedora, mu zabno dsımwo u hurorayda ma grube marıhbone dı Dacış uhul ucdo dilonoyith bıthır mıdmabdanwo a’fulhone du bnoyo u hethotho uhul ucdo.

U qaymaqam Matti bi maqırhonuthayde mırle “bayn 50 uhul 60% mu camaydan dıtrewolın a’botaththe mfothıd da hçome marıhbone dı Dacış, daciri ucdo li qastra d’Bağdede. Wa came hrene dıdaciri li qastra kmote u menyonaththe l’zıd m’90%”.

U qaymaqam Matti mawdacle ste dsim u bnoyo u hethotho da citotho u masığde dkıtne bı Bağdede, baynothaye u bnoyo di cito d’Yuldath Aloho d’Altahira Alkubra dkıtyo i cito rabtho dkulle bu qlimo du madınho mescoyo, u grışle u zuhoro cali socurutho dsımwole ela i qadişutho du papa Mor Fransis Qadmoyo bu yarho d’Nison dşaficina.

Camgabıdathe, u qaymaqam Bahnam Matti mawdacle dmasrıf hul ucdo 6 milyare dinore Iraqoye cala tarmiyotho d’Bağdede, bu taro da tahrazyotho du quyomo da qlime udu terkiwo di şalyutho bu Iraq, u maglele ste dımbayın hedor 2 milyare hrene laşan tarmiyotho dgıdmisomi bu dactid bi qastra Suryoyto d’Bağdede.