Beyn da 10 qtiloye d’Örebro kito u Suryoyo Salim Karim İskef

ÖREBRO, Swed – Lfuth i mawdconutho dmatilan me Örebro, beyn da qtiloye du hçomo barbroyo dsımwo 4 bu yarhano, nafıq’ste ha man abne du camaydan dhawiwole belhude kmo eşne bu Swed. Salim Karim İskef dkıtwe me Holob, nafıq beyn da qtiloye ubi cito Suryoyto d’Yuldath Aloho d’Örebro, mtayıb adyawma bi şoctho da 17.00 caza cali ruhayde.

Bebzabno athmıl bi cito d’Mor Zoxe-St Nicolai b’Örebro, sim slutho la qtiloye ula dıbhe du hçomano u hadırle u malko wi malıktho du Swed, rişone d’gabe frişe du athro. Camathe cal ışme du Mawtbo da Citotho bu Swed ucal ışme di cito Suryoyto Orthodoksoyto bu Swed-u efetrufo fatıryarxoyo di marcitho hasyo Mor Diyosqoros Benyamen Ataş, hadır bu Qurobo Alohoyo dsim leşan dmathkıri a ruhotho da 10 qtiloye.

İ mcalyuthayde bu mamlo dsımle mırle; U hçomano latwe belhude cal farsufe dlatwolın ayya hawbo, elo calu kenşo Swedoyo kule ucali hirutho di noşutho’we. Wu camo kule camhıdode, b’haymonutho u sabro gıdğolıb i bişutho bu nuhro ubi hubo. Me gabo hreno u polis Swedoyo maglele cali hiyoyutho du thimoyo dkıtyo Swedoyo u ışme Richard Andersson u 35 eşne.

Mawdıc du thimoyo latwole hawrone u rişe kull naqla mkasyo’we wu polis dıkmdawım a buhone wa buqore cama farsufe dkıtwın bi duktho bu zabno du hçomo, lıkhoze dkito nişo ideolojik bıthre du hçomano. Camathe’ste mahıtle u polis ido cal 4 falqe d’zayne dkıtwole u thimoyo warqo ruşmoyto calaye. Cali aykanoyuthathe, u rişwazire du athro qrele la rişone da gabe frişe du Swed l’ytawto şnızto. U hçomano dkıtyo u qamoyo bu makthabzabno du Swed, xlıqle zmomo rabo bu tbocofroso Emwothoyo’ste.