B’Ha İyor mtayıb tagliyotho b’mdinotho u athrawotho frişe dbritho. Hın ma tagliyothani şafico b’mşaynutho uğer’ste hthimi bi qale dhawyo camu polis

BRITHO — Ha İyor tethkar qawyo du şuşoto dsımwole u zawco da falohe wu ağono dhiw leşan i şawyutho, li kinutho u leşan şartat towo du fulhono. U yawmano dıkmivayıd b’britho kula, kımalım u camo l’tagliyotho mşawtıfe u l’hfitwotho leşan u teqwiyo di awyutho beyn da falohe dbritho. U yawmano’ste kıducri a şerşayde la tagliyotho da falohe dsimiwo b’Chicago d’Amerika ban 1886 leşan dmihadıdi a şoce du şuğlo. Elo u yawmano latyo belhude leşan dmitathkır u dacbar, elo dmıgrış’ste u zuhoro cal şwole u qetre yawmoye d’ucdo’ste.

Bu dumyano, adşato’ste mtayıb tagliyotho u hfitwotho frişe b’mdinotho u athrawotho mşahlıfe dbritho. Athmıl dkıtwe Ha İyor b’2 dukotho du kanton di Gozarto bu garbay madınho d’Suriya mtayıb hfitwotho bu slogan; Qroyto lu Şlomo u lkenşo Demoqratoyo-camhıdode mcaydina u yawmo d’Ha İyor. La hfitwothani’ste mıştawtaflın ba mowat man abne du qlimo-Suryoye, Kurdoye, Ezidoye, Caraboye uğer.

B’Boğdod du Cıraq tlıblın a mtagliyone mşaynutho u gade du fulhono ubı dukotho frişe d’Turkiya; beynothaye Stanbul hadır ban alfayo dıbnaynoşo la tagliyotho dsimi ma ğrobe Semoloye u cal dmahıtwo mnoco dmisım taglitho bu wahdo d’Taksim, nafıq taxtuşe qaşye beyn du polis dhçımle calu camo. B’Kadıköy i taglitho şafico b’şalyutho, cal du polis huwole aftho dmisomo i taglitho bi karxutho.

Bebzabno ba mowat dıbnaynoşo b’Amerika ubğer athrawotho frişe dbritho; xıd u Cıraq, Hınd, Pakistan, Qore i Taymnoyto, Fillipin, athrawotho frişe d’Urifi udi qıtca d’Amerika i Latinoyto mathkarlın athmıl a came u yawmano d’Ha Nison u tlıblın a zedqathe. B’mdinotho frişe d’Amerika’ste a mtagliyone krıhlın i siyase dıkmaşe u rişono Donald Trump, u qento da yaminoye tuhmonoye udu faşizm, sbutho hreto dmıdla duktho ba tagliyothani-kıtwo u qrobo b’Ukraina, u şwolo d’Ğazza uğer’ste tlıblın.