Bi mditho d’Nörköping, Swed, sim u futoho d’cito hathto di marcitho di cito d’Madınho d’Othuroye bu ışmo i cito d’Mort Şmuni wa Şawco Abnayda

NORRKOPING, Swed – Bu siqumo d’2 bu yarhano, mtayıb bi mditho d’Nörköping bu Swed, u zawho du futoho ruşmoyo di cito d’Mort Şmuni uda çawco abnayda dkıtyo masırto cami marcitho di cito d’Madınho d’Othuroye. 

U zawho du futoho mrayşın mu hasyo di marcitho du Swed, d’Skandinavia ud’Almanya Mor Codişo Oraham, bi mıştawtfonutho d’mathlone ma citotho mşahılfe du camaydan di mditho, rişone tawdithoye u hadome da mawtbe da citotho. 

Bu zawhano, sim mamle m’Yacqub Şanko um’Danial Yuxanna dkıtyo u rişono du mawtbo di cito, u sim ste mamlo mu kohno di marcitho qaşişo Afram İshaq dmahwele yasifutho dilonoyto dmisım u garanti dıtıcno i cito u tabco madınhoyo şerşoyo dkıtla. 

Bıthır mathe, u hasyo di marcitjho du Swed Mor Codişo Oraham bu mamlo dsımle mathkarle i aye du mgalyun qadişı dkımmo “in dlıbone Aloho u bayto, batıl yo u tacbo da banoye”. Bu mamlayde, Mor Codişo mahwele ste i fsihutho dkıtle bu şutosano u ruhonoyo hatho dkıtyo mbayno laşan di mhadronutho du ışmo d’Aloho udi mşablonutho du barnoşo. 

Bu huthomo du zawhano, a’hadire wa zmine kulle karixi b’gawıd da ferce di cito d’Mort Şmuni uda şawco abnayda. 

Yawme d’Şabtho dşaficina ste bi rişonutho du hasyo wa kohne di marcitho, sim u tekso dilonoyo du qudoşo di cito d’Mort Şmuni uda şawco abnayda bi mıştawtfonutho d’kunoşo dımhaymne.