Bi mimartho dıfris kmitahke cala qetre du cameydan dıkcaşe b’Mawsal

Ha man abne du camaydan fsıqle docır lu baytayde dkıtyo bi mdito d’Mawsal, walaw u bayto hariwoyo u lıkmıqdır dmicış bıgawe.

 Bu tebano u bı mimartho hreto dıfriso bi dafo d’Rudaw, kmitahke calan abne du camaydan b’Mawsal wa qetre dıkloqın bi sbutho du tapo udu qadastro da narcotho u da mulkonathe.

Bu tebo dıfris bi dafo d’Rudaw, griş u zuhoro cal Josef Gabriel dkıtyo hedor a 70 eşne wu fusqono dmıdle, dı docır lu baytayde u hariwo dkıtyo bi mdito d’Mawsal. İ şawtho dkıtyo u baytaydeste, lıkmicış eba mcal fothe du husrono dhzela ma hçome da marhıbone d’Dacış u da cuqobe dsımwole u gayso Iraqoyo wu koalisyon acla.U bayto du Gabriel’ste sımwo nuqazto d’Dacış bu zabno dkbişowa i mdito ba 2014.

U camaydan cama comure hrene di mdito, heş kınutri mi şultonutho dmitahwelın mcadronutho leşan dqudri dbonın dımhathıthi a botathe. Gabriel mırle; Hano u baytaydi’we. Zwınwoli b’timo celoyo wu ucdo laybe noşo dcoyış ebe. Klozım dmitahwewolan tazminat, leşan dbonina a botaydan wa citothaydan dkıtne hariwe leşan dmabdenawo a hayaydan me hatho.

Mawdıc dhol 50 yaqrotho daciri l’Mawsal mu zabno dımharıro me Dacış uholucdo u kull noşo kobe ağono, leşan dbonın a dukothathe. Bebzabno b’mimartho hreto dfriso calu camaydan b’Rudaw, griş u zuhoro calu qetro du mal u mulkayde dkbiş, dımzabın lo qonunoyith u ğerste markawlın ruhaye ba botani. Bu tebano mawdıc, bu zabno du cnufyo dsim cala Mşihoye, ban alfayo mahzamwolın u trewolın a botathe. Bu dcorathe’ste, hzelın a Mşihoye da botathe kbişi me ğrobe folhoye wa yaqrothathe uğerste mzabni b’ğnizutho.

Bu tedciro da botani’ste, kmitabde maşıqlo yarixo u matcıbono du byrokrati ubi harayto’ste, a more kımvayci a Mşihoye i dacwa. A more hathe’ste kımtaybi warqe hathe lo qononye dıkmahwın dkıtne hınne a more da botani. Bi sbuthathe da bote da Mşihoye, u rişono Şica Muqtada al Sadr’ste mawdacwole, da bote da Mşihoye klozım dmisaytıri u dmidacıri la morathe a şarire. Kmitawdıc dhol 20 ba du qetrano da mulkone şre, elo heş 80 ba mo lo şre. Bi socurutho du Papa lu Cıraq’ste, kmıntır dmıgrış u zuhoro cali sbuthathe da mulkone du camaydan.