Bi netiçe da hçome barbroye du gayso Turkoyo mawqıdo İqritho d’Çallık kula

Bi netiçe du hçomo barbroyo dıksamle u gayso kaboşo dı Turkiya calu garbiyo du Iraq, an’arcotho di qritho d’Çallık du camaydan mawqıdi kulonoyith.

Lfuth hın ma comure di qritho, i claymutho du camaydan kımnasyo ucdo dmaxılso a’qatce da cwone dfayişi bi qritho d’Çallık.

U gayso kaboşo dı Turkiya bi dacwa du nfoqyade mqabıl da mharbone di PKK, kımdawım b’şıkıl barbroyo a’hçomayde cala fenyotho u qıryawotho mşahılfe bu garbiyo du Iraq, baynothaye a’qıryawotho du camaydan dkıtne qariwe ma thume dcam Turkiya.

U matibono du froshezwo Iraqoyo d’Alhurra bi hiğmonutho d’Nuhadra, bi maqırhonutho dhule, mawdacle mi celtho da hçome dıksaymolın Turkiya ubi netiçe da taxtuşe dkowın bayn du gayso Turkoyo wa mharbone di PKK, a’yuqdone mbarbızi bı menyono ma qıryawotho dkıtne qariwe ma thume dı Turkiya.

Menyono ma comure di qritho d’Çallık du camaydan bu garbiyo du Iraq, bi maqırhonutho dhulın lu froshezwo d’Alhurra, mawdaclın di qritho mawqıdo kula, elo menyono ma clayme di qritho kımnasın ucdo dmaxılsi a’qatce da cwone bıthır mdımgalwelın a’yaqrotho mena.

Yunan Yuxanna dkıtyo ma comure di qritho d’Çallık, mathkarle d’99% ma n’arcotho di qritho b’şıkıl kulonoyo mawqıdi.

Cali sbuthathe, u matibono d’Alhurra makadle da hçome oyaroye dı Turkiya kımdawmi hul ucdo cal fenyotho rabe bi hiğmonutho d’Nuhadra, u mawdacle ste da comure tlıblın mi şultonutho qentrunoyto d’Boğdod dsaymo mudaxala, laşan dmitaklın ahçome Turkoye dhawın mabuco dkımhadıdi a’hayaththe.

Turkiya bu yarho d’Nison dşaficina, mabdewola cuqobe folhoye mqabıl da mharbone di PKK dkıtne ba turone d’Qandil bu garbiyo du Iraq. La cuqobani dhulın husrono rabo la mdinoye, kmıştawtıf 5 alfo folhe Turkoye dıkmısnodi m’Holikoptıre u tayisyotho dlo pilot u haylawotho dilonoye.