12/02/2020

Bi netiçe da taxtuşe qaşye ahaylawotho d’MFS mahıte ido cal menyono d’radoyotho folhoye da çatawiye d’Turkiya

A’haylawotho du gayso kaboşo dı Turkiya, l’celotho dheş latne mbayne grişi ma qıryawotho dıkbışiwolın hedor di mditho dı Tel Tamır bu garbay madınho d’Suriya.

 Be bzabno, u froshezwo mşamho d’Alhadath mawdacle du mawtbo folhoyo Suryoyo d’MFS mahıtle ido cal radoyotho folhoye bıthır mıdnafıq mqabıl da hçome dsımlın a’grube marıhbone dı Turkiya cali fnitho d’Abu Rasen dıknıflo bu garbiyo di mditho di Hasake.

İ mşatasto d’Suriya de zedqe noşoye bi maqırhonutho dhula lu froshezwo Caraboyo mşamho d’Alhadath, mawdacla da haylawotho kaboşe dı Turkiya, grişi ma nuqazyotho dmarkawwolın bi fnitho dı Tel Tamır ud’Abu Rasen bu garbay madınho d’Suriya, l’celotho dlımawdıcila Anqara. A’qıryawotho dıgriş menaye u gayso kaboşo dı Turkiya hanine: (H)lewa, Jamus, Carişa, Ma(h)mudiyya, Alsoda, Alsacid u Xırbıt Jammo.

Lfuth i maqırhonutho dhula i mşatasto d’Suriya lu froshezwo d’Alhadath, a’qıryawothani dıgriş menaye u gayso kaboşo dı Turkiya latwın bu asas b’gawıd di tahrazto dı Turkiya, ubaynothayeste dmaftelın fothaye lafi qastra dı Tel (H)alaf dıkrıhqo balhude 3 kilomıtre mu macırbo di mditho d’Rişcayno.

Camgabıdathe, u froshezwo d’Alhadath mawdacle du mawtbo folhoyo Suryoyo dkıtyo falqo ma haylawotho d’Suriya demoqratoyto d’Qasad, athmıl nafıq mqabıl da hçome dsımlın a’grube marıhbone dı Turkiya cala gbine du qrobo hedor di fnitho d’Abu Rasen. Ubi netiçe da taxtuşe qaşye dhawın bayn da tre gabe, a’mharbone d’MFS mahıtlın ido cal menyono d’radoyotho folhoye da çatawiye dı Turkiya.

Meqım kmo yawme ul’celotho dlatne idice, a’haylawotho kaboşe dı Turkiya grışiwo mi fnitho garbyoyto dı Tel Abyad bi hiğmonutho d’Raqqa, u markawolın ruhaye bi fnitho macırboyto dı Tel Abyad.

Cala celotho du groşo dı Turkiya ma fenyothani, i mşatasto d’Suriya da zedqe noşoye mawdacla da haylawotho Turkoye grişi bi netiçe da cuqobe şnize da haylawotho d’Qasad dzayidi ba yawme haroyani, udıqtılwo ebaye hul 20 marıhbone ma çatawiye dı Turkiya, ube bzabno cal d’40 çatawiye mu grub d’Liwaa Almajıd maslamlın u zaynaththe, bnişo dıdıcri li fnitho d’İdlıb. Mawxa ste Turkiya ba gbine qadmoye du qrobo mşahlafla a’çatawiye ba folhayda u maqwelaste a’nuqazyotho dkıtla bi fnitho dkıtyo bayn di maşritho d’Cayn Cisa huli qritho d’Cabdoke bu garbiyo d’Raqqa.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…