Bi rişitho; Bu sebyono di hdoyutho umthoyto, kımcaydina u cedo du nuhomo d’Mşiho’ kımşare u buyono dfrısle u MUB bi cohnutho du cedo di Qyamto d’Moran

Ba mele ‘U Cedo du Nuhomo d’Mşiho, cama Mşihoye dbritho kula b’fsihutho u bu sabro du şlomo, kmıstaqbılinale, dfrışle u Mawtbo Umthoyo d’Bethnahrin u buyonayde bu yawmo du cedano di Qyamto. MUB mırle; Adşato an Orthodoksoye, Qatholikoye u Protestanoye wa Mşihoyo kulle, cal dkımcaydi u cedo du Nuhomo d’Mşiho bcayni yawmo, kımqarıw zıttır i britho lıhdode, u ktore dcayşo i ruho di awyutho. U perspektif di cyeşe dıkmişawşıt bi cohnutho du cedo du Nuhomo d’Mşiho, kmabhır u dactith du camaydan, u kmahwe u darbo triso du kruxyo di hdoyutho’ste.

U şuhlofo dkowe bu Madenho Mescoyo, kıtore u camaydan dhowele mkono dımathıl i hiyoyuthayde, u dmawfıq a siyasat du tenkiro kulle lu xalyo. Ba şartat hathe dımşakıl, xıd şutose u tukose siyasi, tawdithoye, umthoye u kenşoye du camaydan khozina sniqutho dımqadmina zıttır lıhdode, dobina ido bido u dmahwena u sıbyono du şroyo da şuwole mşawtıfe dkıtlan. Ba dawsat dımhalqi wu tacbo dıkmitahwe kobe tuxlono, sabro u ithiqi-moral la falqe du camaydan kulle. Calathe, a cede tawdithoye udi umthaydan, u ağuno folitiqoyo, umthoyaydan wa timoyotho marduthoyaydan zıttır kıqumri sukolo u ulsoyutho.

MUB dmahkele calu nuhomo d’Mşiho dhawi hani 2 alfo eşne nubco du camaydan dfoyış cali rağlo mırle’ste; Kmaydina haylo ma timoyotho du maktabzabno, tawdithoye u kenşoye dtırallan cali rağlo, u kobina ağuno b’nushono cali nfıqto bi hiyoyutho umthoytaydan. U camaydan inaqla dmoyıd a zedqayde camu ağunano, gıdhowele’ste mkone dcoyış hiro bu athro da abohothayde. İnaqla dımmathıl i ithuthayde bu sıbyonayde’ste, gıdmıshofi a şurone di zuctho wa tahlukat dkito acle’ste gıdmitaqimi mi holo. A fulhone di hdoyutho dımabdın cama falqe u tukose du camaydan bu maşıqlano camgabe dgımaqwın kulayna zıttır, gıdımsarhıbi u şroyo da şuwole maktabzabnoye u kenşoyaydan’ste.

MUB bu huthomo komır; Bu asasano a dawsat mşawtıfe dgımhalqina b’Suriya uba falqe hrene du athraydan, leşan u camaydan dqomır statü siyasi, umthoyo gıdmimıd snodo Emwothoyo’ste. Calathe  u myodo di hirutho du camaydan cal dkıtyo masro bu temtiyo da wolyotho uda mşalonwotho dıknıfli aclayna li duktho, alisena bfusqono kamilo u bşıkıl tukosoyo dobina funoyo lu maşıqlano. Bışme du Mawtbo Umthoyo d’Bethnahrin, kımcaydina u Cedo du Nuhomo d’Mşiho di noşutho kula, du cılmo Mşihoyo, da Rişone tawdithoye du camaydan, da yaqaryotho da Sohdaydan, da mathlone da şutose u tukose dkobın ağuno li hdoyutho umthoyto, u du benyono tukosoyaydan.